బీఆర్ఎస్ పార్టీతో కవిత రుణం తీరిపోవడంతో.. వాట్ నెక్ట్స్ అన్న ప్రశ్న ఎక్కువగా తెలంగాణ రాజకీయాల్లో వినిపిస్తోంది. ఆమె సొంత రాజకీయ పార్టీ పెట్టుకోవడానికి కొంత కాలంగా కసరత్తు చేస్తున్నారు. క్యాడర్ ను తయారు చేసుకుంటున్నారు. ఈ ప్రక్రియలో మరింత దూకుడుగా వ్యవహరించి.. స్థానిక ఎన్నికల తర్వాత అయినా ఆమె సొంత పార్టీ పెట్టుకునే అవకాశం ఉంది. సొంత పార్టీ పెట్టుకుంటే కవిత ప్రభావం ఎంత ఉంటుందన్నదానిపై ఇప్పటికే పలు రకాలుగా విశ్లేషణలు ప్రారంభమయ్యాయి.
కేటీఆర్ కన్నా బెటర్ నాయకత్వ లక్షణాలు
కేసీఆర్ తెలంగాణ ఉద్యమాన్ని ఓ రేంజ్ కు తీసుకెళ్లిన తరవాతనే కవిత రాజకీయాల్లోకి వచ్చారు. తెలంగాణ ప్రజల్ని సాంస్కృతికంగా ఏకం చేసే బాధ్యతల్ని ఆమెకు ఇచ్చారు. తెలంగాణ జాగృతి పేరుతో ఆమె ..తనకు వచ్చిన అవకాశాన్ని బాగా వినియోగించుకున్నారు. మహిళలలో ఫాలోయింగ్ తెచ్చుకున్నారు. బతుకమ్మ ఉత్సవాలతో పేరు తెచ్చుకున్నారు. రాజకీయాలోనూ బీఆర్ఎస్ తరపున ఉమ్మడి నిజామాబాద్ జిల్లాలో చక్రం తిప్పారు. పరిస్థితి బాగున్నప్పుడు ఆమె గీసిన గీత నిజామాబాద్‌లో ఒక్క నేత దాటేవారు కాదు. కేటీఆర్ తో పోలిస్తే.. నాయకత్వ లక్షణాలు బెటరేనని బీఆర్ఎస్ నాయకులే చెప్పుకుంటారు.
సొంత పార్టీ పెట్టుకుంటే కాస్త ప్రభావం చూపించడం ఖాయం
కవిత సొంత పార్టీ పెట్టుకుంటే దున్నేస్తారని ఎవరూ అనుకోవడం లేదు. ఆమె కూడా అలా అనుకుంటారని భావించడం లేదు. కానీ రాజకీయంగా ప్రభావం చూపించాడనికి రాష్ట్రం మొత్తం దున్నేయాల్సిన అవసరం లేదు. ఏదైనా ఓ పార్టీ గెలుపోటముల్ని ప్రభావితం చేయగలిగే బలం తెచ్చుకుంటే చాలు గేమ్ ఛేంజర్ కావొచ్చు. భారత రాష్ట్ర సమితి బీజేపీలో విలీనం అయితే.. తెలంగాణ పార్టీగా.. కవిత పార్టీనే ఉంటుంది. ఒక వేళ విలీనం కాకపోతే.. బీఆర్ఎస్ ఓటు బ్యాంకులో మూడు, నాలుగు శాతం అయినా సొంతం చేసుకుంటుంది. ఈ మాత్రం చాలు బీఆర్ఎస్ ను ఓడించడానికి.
ఎంత ఎటాక్ చేస్తే బీఆర్ఎస్‌కు అంత నష్టం
కవితపై బీఆర్ఎస్ ఒక్క సారిగా దాడి పెంచింది. మాజీ జాగృతి నాయకులను రంగంలోకి దింపి.. జాగృతి మాదేనని చెప్పించడం ప్రారంభించారు. పార్టీ నేతలంతా విమర్శలు చేస్తున్నారు. అయితే ఇలా టార్గెట్ చేయడం.. కవితను బలపరుస్తుంది. కవితకు కావాల్సింది కూడా అదే. అందుకే తనపై బీఆర్ఎస్ వైపు నుంచి మరింత ఎక్కువ దాడి జరిగేలా ఆమె ముందు ముందు రాజకీయాలు చేసే అవకాశం ఉంది. కవిత.. సొంత పార్టీతో.. తిరుగులేని విజయాలు సాధిస్తారని అనుకోలేరు కానీ తన టార్గెట్ ను మాత్రం ఆమె అందుకోగలరు.
