రెవిన్యూ సంస్కరణల్లో దేశానికే తెలంగాణ ఆదర్శమని తెలంగాణ సీఎం కేసీఆర్ అన్నారు. కొత్త రెవిన్యూ చట్టానికి అనుగుణంగా అక్రమాల్లేని సరికొత్త విధానం కోసం ధరణి పోర్టల్‌ను ప్రారంభించారు. కొన్నాళ్లుగా ఆగిపోయిన వ్యవసాయ భూముల రిజిస్ట్రేషన్ ప్రక్రియ కూడా ప్రారంభించారు. వ్యవసాయేతర భూముల రిజిస్ట్రేషన్ ప్రక్రియ మాత్రం మరో రెండు వారాల తర్వాత ప్రారంభమయ్యే అవకాశం ఉంది. మేడ్చల్ జిల్లాలో ఏర్పాటు చేసిన కార్యక్రమంలో కేసీఆర్ ధరణి పోర్టల్‌ను లాంఛనంగా ప్రారంభించారు. కొత్త విధానం వల్ల.. వ్యవసాయ భూములను తహశీల్‌దార్లే రిజిస్ట్రేషన్ చేస్తారు. తహసీల్దార్ల వేలిముద్రలతోనే రిజిస్ట్రేషన్ ప్రక్రియ పూర్తి పూర్తి అవుతుంది. తహసీల్దార్‌ కార్యాలయంలో రిజిస్ట్రేషన్, మ్యుటేషన్‌ ప్రక్రియ పూర్తి చేస్తారు. వ్యవసాయేతర భూములకు సంబంధిచి ప్రతి ఓపెన్ ప్లాట్ దారుడు నాన్ అగ్రికల్చర్ ఆస్తిగా నమోదు చేసుకోవాల్సి ఉంటుంది. ప్లాట్ల వివరాలు వెబ్‌సైట్‌లో కనిపించొద్దనుకుంటే హైడ్ ఆప్షన్ పెట్టుకోవచ్చు. పూర్తి టైటిల్ విషయంలో ఓనర్ నష్టపోతే ప్రభుత్వమే పరిహారం ఇస్తుందని ముఖ్యమంత్రి కేసీఆర్ ప్రకటించారు.
రైతుల భూములకు సంపూర్ణ రక్షణ కోసమే ధరణి పోర్టల్‌ ప్రారంభించామని.. ఒక తప్పు జరిగితే భవిష్యత్‌ తరాలు ఇబ్బందులు పడతాయన్నారు. తప్పటడుగులు లేకుండా రైతుల కోసం కఠిన నిర్ణయాలు తీసుకున్నామన్నారు. కోటి 45 లక్షల 58 వేల ఎకరాల భూముల వివరాలు… ధరణి పోర్టల్‌లో అందుబాటులో ఉన్నాయి. విదేశాల్లో ఉన్నవాళ్లు కూడా వారి భూముల వివరాలు చూసుకోవచ్చని కేసీఆర్ ప్రకటించారు. ఇక అక్రమ రిజిస్ట్రేషన్లకు తావు లేకుంా… కొత్తగా జరిగే క్రయ, విక్రయాలు నమోదు నిమిషాల్లో పూర్తవుతాయన్నారు. ధరణి పోర్టల్‌ నమూనా పత్రాలు కూడా అందుబాటులో ఉన్నాయని వాటి ఆధారంగా ఎవరికివారే రిజిస్ట్రేషన్ చేసుకోవచ్చని కేసీఆర్ తెలిపారు.
కొత్తగా డాక్యుమెంట్‌ రైటర్ల వ్యవస్థను కూడా కొనసాగిస్తున్నారు. అయితే ఎవరు పడితే వారు కాకుండా… జిల్లా కలెక్టర్లు ప్రత్యేకంగా గుర్తింపు ఇస్తారు. డాక్యుమెంట్‌ రైటర్లు తీసుకోవాల్సిన ఫీజును కూడా నిర్ణయిస్తారు. పాత రిజిస్ట్రేషన్ ఛార్జీలే ఉంటాయని.. రూపాయి కూడా పెంచలేదన్నారు. ధరణి పోర్టల్‌లో సాంకేతిక సమస్యలు రావని కేసీఆర్ తేల్చి చెప్పారు. చాలా రోజులుగా తెలంగాణలో రిజిస్ట్రేషన్లు ఆగిపోవడంతో అంతా గందరగోళంగా మారింది. ఇప్పుడు కూడా వ్యవసాయ భూముల రిజిస్ట్రేషన్లు మాత్రమే ప్రారంభమయ్యాయి. ఇళ్లు ఇతర రిజిస్ట్రేషన్లకు మాత్రం మరో రెండు వారాలు పట్టే అవకాశం ఉంది.
