కేటీఆర్ స్మగ్లింగ్ చేసి..సెకండ్ హ్యాండ్ పేరుతో అమ్మిన కారులో తిరుగుతున్నారని బండి సంజయ్ ఆరోపించారు. అయితే రేవంత్ కూడా కొన్నారని టీఆర్ఎస్ నేతలు ఆరోపించారు. దీంతో రవాణా మంత్రి పొన్నం మొత్తం వ్యవహారంపై వివరాలు ఇవ్వాలని ఉన్నతాధికారుల్ని ఆదేశించారు. కేటీఆర్ వాడుతున్న ల్యాండ్ క్రూయిజర్ కారును ఓ సెకండ్ హ్యాండ్ కార్ల యజమాని దగ్గర కొన్నారు. నిజానికి ఆ కారు టాక్స్ కట్టకుండా స్మగ్లింగ్ చేసి తీసుకు వచ్చారని తేలింది.
కేసీఆర్ హయాంలో తన కాన్వాయ్ కోసం.. కొత్త కార్లు కొని విజయవాడ గ్యారేజీలో బుల్లెట్ ఫ్రూఫ్ చేయిస్తున్న సమయంలోనే ఎన్నికలు వచ్చి ఓడిపోయారు. ఆ కార్లను రేవంత్ సర్కార్ కొనిందని బీఆర్ఎస్ నేతలంటున్నారు.అయితే ప్రభుత్వం స్మగ్లింగ్ చేసిన వాటిని కొనే అవకాశం లేదు.కేసీఆర్ హయాంలో అయినా అడ్డదారిలో కొనాల్సిన పని లేదు. ఈ రచ్చ ఇక్కడ జరుగుతూండగానే.. కేరళలో సినీ స్టార్లు, వ్యాపారవేత్తల ఇళ్లలో సోదాలు జరిగాయి. వారు కూడా లగ్జరీ కార్లను పన్నులు కట్టకుండా సెకండ్ హ్యాండ్ పేరుతో కొన్నారని తేల్చారు.
భూటాన్ నుంచి , దుబాయ్, శ్రీలంక నుంచి కార్లు తీసుకు వస్తున్నారు ఆయా కార్లపై ఇండియాలో వంద శాతం పన్ను ఉంటుంది. రెండు కోట్ల కారు అయితే ఇండియాలో రెండు కోట్ల పన్ను కట్టాలి. ఇలాంటి పన్నుల్ని ఎగ్గొట్టేందుకు ఐదారు కోట్ల వరకూ ఖరీదైన వాహనాల్ని స్మగ్లింగ్ చేసి తీసుకు వస్తున్నారు. వాటికి సెకండ్ హ్యాండ్ అనే ముద్ర వేసి అమ్ముతున్నారు. ఈ లెక్కలంతా ఇప్పుడు బయటపడే అవకాశాలు కనిపిస్తున్నాయి. బండి సంజయ్ కూడా.. కేంద్రం నుంచి ఈ తీగ లాగే అవకాశాలు కనిపిస్తున్నాయి.
