శ్రీకాంత్ అడ్డాల దర్శకత్వంలో మహేష్ బాబు హీరోగా చేస్తున్న ‘బ్రహ్మోత్సవం’ సినిమా షూటింగ్ సెప్టెంబర్ 16 నుండి హైదరాబాద్ రామోజీ ఫిలిం సిటీలో మొదలయింది. ఈ సినిమాని పెరల్ వి. పొట్లూరి, పరమ్ వి. పొట్లూరి నిర్మిస్తున్నారు. ఈ సినిమాలో ముగ్గురు అందాల భామలు సమంత, కాజల్ అగర్వాల్, ప్రణీత హీరోయిన్లుగా నటిస్తున్నారు. తనికెళ్ళ భరణి, రావు రమేష్, నరేష్, షాయాజీ షిండే, కృష్ణభగవాన్, జయసుధ, రేవతి,తులసి, ఈశ్వరీ రావు, రజిత, కాదంబరి కిరణ్, చాందినీ చౌదరి తదితరులు ముఖ్యపాత్రలలో నటిస్తున్నారు.
ఈ సందర్భంగా హీరో మహేష్ బాబు మీడియాతో మాట్లాడుతూ, “సీతమ్మ వాకిట్లో సిరిమల్లె చెట్టు” సినిమా తరువాత మళ్ళీ ఇన్నాళ్ళకు శ్రీకాంత్ అడ్డాలతో చేస్తున్నాను. శ్రీకాంత్ చెప్పిన స్టోరీ లైన్ నాకు చాలా నచ్చింది. ఇది కూడా ఆ సినిమాలాగే మంచి ఫ్యామిలీ ఎంటర్టెయినర్ అవుతుందని నమ్ముతున్నాను. శ్రీమంతుడు వంటి మంచి సందేశాత్మకమయిన సినిమా తరువాత ఇటువంటి మంచి సినిమా చేస్తుండటం నాకు చాలా ఆనందం కలిగిస్తోంది,” అని అన్నారు.
దర్శకుడు శ్రీకాంత్: “మా బ్రహ్మోత్సవాన్ని సరిగ్గా తిరుపతిలో బ్రహ్మోత్సవాలు మొదలయిన రోజే మొదలుపెట్టాము. మొదటిరోజు షూటింగ్ లో హీరో మహేష్ బాబుతో సహా మొత్తం 21మంది ప్రధాన నటీనటులతో ఒక సెలబ్రేషన్ సాంగ్ ను చిత్రీకరించాము. ఇకపై ఈ సెలబ్రేషన్స్ కంటిన్యూ అవుతూనే ఉంటాయి,’ అని అన్నారు.
నిర్మాత ప్రసాద్ వి. పొట్లూరి: “ఆర్ట్ డైరెక్టర్ తోట తరణిగారి నేతృత్వంలో మొత్తం 513మంది నిపుణులు, వర్కర్లు కలిసి పనిచేసి ఒక అత్యద్భుతమయిన సెట్ తయారు చేసారు. అందులోనే ఇవ్వాళ్ళ షూటింగ్ చేసాము. వచ్చే వేసవికి మా బ్రహ్మోత్సవం విడుదల చేయాలని అనుకొంటున్నాము.”
కధ, దర్శకత్వం మరియు స్క్రీన్ ప్లే: శ్రీకాంత్ అడ్డాల సంగీతం: మిక్కీ జె మేయర్, కెమేరా: ఆర్. రత్నవేలు, డాన్స్: రాజు సుందరం.
