కాశ్మీర్లో సమస్యను పరిష్కరిస్తామంటూ బయల్దేరిన ప్రతిపక్ష ఎంపీలు, వేర్పాటు వాద నేతల చేతిలో ఘోర అవమానానికి గురయ్యారు. ఒక రకంగా ఛీ అనిపించుకున్నారు. కాశ్మీర్లో పరిస్థితిని అధ్యయనం చేస్తామని, అందరితో మాట్లాడతామని, కాబట్టి అఖిల పక్ష ఎంపీల బృందాన్ని పంపాలని విపక్ష ఎంపీలు ఇటీవల పార్లమెంటులో కోరారు. దీనికి మోడీ ప్రభుత్వం ఒప్పుకుంది.
కేంద్ర హోం మంత్రి రాజ్ నాథ్ సింగ్ నాయకత్వంలో ఈ బృందం ఆదివారం ఉదయం శ్రీనగర్ వెళ్లింది. ఆ తర్వాత వేర్పాటు వాద నేతలతో మాట్లాడటానికి కొందరు ఎంపీలు బయల్దేరారు. అసలు ఈ ప్రతిపాదనే సరికాదంటూ బీజేపీ, కాంగ్రెస్ నేతలు దూరంగా ఉన్నారు. అయినా, ముగ్గురు నేతలు ముందుకు వెళ్లి భంగపడ్డారు.
పాకిస్తాన్ చెప్పినట్టల్లా ఆడే కరుడుగట్టిన వేర్పాటు వాది గిలానీని కలవడానికి వామపక్ష నేతలు సీతారాం ఏచూరి, డి. రాజా, జేడీయూ నాయకుడు శరద్ యాదవ్ పోలోమని వెళ్లారు. కానీ వీళ్లను కలవడానికి అతడు నిరాకరించాడు. కనీసం తన ఇంటి తలుపులు కూడా తెరవలేదు. ఎంపీలు ఎంత ప్రయత్నించినా వీరిని కలవలేదు. పైగా, ఇంటి ముందు అతడి అనుచరులు జాతి వ్యతిరేక నినాదాలు చేశారు. కాశ్మీర్ కు స్వాతంత్ర్యం కావాలని డిమాండ్ చేశారు. ఎంపీలకు వ్యతిరేకంగా నినదించారు. ఎంపీలను తోసేయడానికి ప్రయత్నించారు. ఇష్టం వచ్చినట్టు ప్రవర్తించి ఘోరంగా అవమానించారు. అయినా సదరు ఎంపీలు నిస్సహాయంగా వెనుదిరిగారు.
గిలానీ ఇంటి దగ్గర అవమానం పొందిన తర్వాత ఈ ముగ్గురూ మరో వేర్పాటు వాది, ఒకప్పటి ఉగ్రవాది యాసిన్ మాలిక్ ను కలవడానికి వెళ్లారు. అయితే నామ్ కే వాస్తేగా వీళ్లను పలకరించి వెళ్లిపోయాడు మాలిక్. తాను మట్లాడటానికి ఏమీ లేదని చెప్పాడు. తమ డిమాండ్లను కేంద్రం ఒప్పుకోవాలన్నాడు.
మజ్లిస్ ఎంపీ అసదుద్దీన్ ఒవైసీ మరోచోట అవమానం పొందారు. వేర్పాటు వాద నాయకులు మిర్వేజ్, షాబిర్ షాలను నిర్బంధంలోనే కలుసుకున్నారు. వాళ్లుకూడా అంటీముట్టనట్టు మాట్లాడి పంపించారు. సాయుధ దళాల ప్రత్యేక అధికారాల చట్టం రద్దు చేయాలని, ఇంకా ఇతర డిమాండ్లను కేంద్రం ఆమోదించాలంటూ వేర్పాటు వాద నేతలు సంకేతాలు ఇచ్చారు. కాశ్మీర్లో జరిగిన అవమానం ఎంపీలకే కాదని, ఈ దేశానికి అని పలువురు ఆవేదన వ్యక్తం చేస్తున్నారు.
