‘బలగం’ సినిమాతో దర్శకుడిగానూ గుర్తింపు తెచ్చుకొన్నాడు వేణు. ‘బలగం’ తరవాత వేణు ఎలాంటి సినిమా చేస్తాడు? ఎవరితో చేస్తాడు? అనే విషయాలపై చర్చ నడుస్తోంది. నానితో దిల్ రాజు కాంపౌండ్ లో వేణు ఓ సినిమా చేయబోతుపన్నాడన్న ప్రచారం ముమ్మరంగా సాగింది. దీనిపై నాని క్లారిటీ ఇచ్చారు. బలగం అంటే తనకు చాలా ఇష్టమని, ఈ దశాబ్దంలోనే తనకు నచ్చిన చిత్రాల్లో బలగం ఉంటుందని, వేణు తదుపరి సినిమా తనతో ఉన్నా, లేకపోయినా, త్వరలోనే వేణుతో ఓ సినిమా ఉంటుందని, అది కూడా దిల్ రాజు బ్యానర్లోనేనని క్లారిటీ ఇచ్చారు నాని.
Also Read : బాలీవుడ్ Vs సౌత్… దూరం పెరుగుతోందా?
”దిల్ రాజుగారి బ్యానర్లో నేను ఓ సినిమా చేయాలి. ‘దర్శకుడు ఎవరైతే బాగుంటుంది’ అని దిల్ రాజు అడిగినప్పుడు ‘వేణు అయితే ఓకే’ అని చెప్పాను. ఆ తరవాత మేం మాట్లాడుకొన్నాం. ఈ విషయం బయటకు వచ్చేసింది. వేణు రెండో సినిమా ఎవరితోనైనా చేయొచ్చు. కానీ ఎప్పుడో ఒకప్పుడు మేమిద్దరం సినిమా చేస్తాం” అన్నారు నాని. ‘బలగం’ తరవాత వేణుపై పెద్ద బాధ్యతే పడింది. ఈసారి కూడా ఆయన మట్టి మనుషుల కథే చెప్పబోతున్నాడు. అందుకోసం కథానాయకుడి కోసం అన్వేషిస్తున్నారు. నితిన్, శర్వానంద్ లాంటి హీరోల పేర్లు పరిశీలనలో ఉన్నాయి. త్వరలోనే వేణు సినిమాలో హీరో ఎవరన్నది తెలుస్తుంది.
