హిట్ సినిమాతో నాని నిర్మాత‌గానూ హిట్టు కొట్టాడు. ఇప్పుడు హిట్ 2 సెట్స్‌పైకి వెళ్లింది. హిట్ లో విష్వ‌క్‌సేన్ హీరో అయితే, హిట్ 2లో మాత్రం అడ‌విశేష్ న‌టిస్తున్నాడు. ఓ హిట్ సినిమా ఫ్రాంచైజీలో హీరో మారిపోవ‌డం అరుదుగా జ‌రిగే విష‌యం. ఓ సూప‌ర్ హిట్ సీక్వెల్ ని వ‌దులుకోవడం అంటే.. ఏ హీరోకైనా ఇబ్బందే. ఈ విష‌య‌మై విశ్వ‌క్ స్పందించాడు.
”హిట్ 2 కూడా నాతోనే చేద్దామ‌నుకొన్నారు. కానీ.. కాల్షీట్లతో ఇబ్బంది వచ్చింది. నా కోసం టీమ్ ని ఆగమ‌న‌డం క‌రెక్ట్ కాదు. అందుకే మరో హీరోతో హిట్ 2 చేస్తున్నారు. నాని అన్న కూడా.. ఒక్కో పార్ట్ ఒక్కో హీరోతో చేస్తే బాగుంటుంది అన్నాడు.. అలా హిట్.. ఫ్రాంచైజీ ఎప్పుడొచ్చినా హీరో మారుతూ ఉంటాడు” అని చెప్పుకొచ్చాడు విష్వ‌క్ సేన్‌. అంతేకాదు… నాని వేసిన మాస్ట‌ర్ ప్లాన్ ఏమిటంటే.. హిట్ 2, 3, 4 ఒక్కో హీరోతో తీసి, ఆ హీరోలంద‌రినీ క‌లిపి మరో సినిమా చేస్తాడ‌ట. అంటే… ఓ భారీ మ‌ల్టీస్టార‌ర్‌కి ఇప్ప‌టి నుంచే రంగం సిద్ధం అవుతోంద‌న్న‌మాట. హిట్ క‌థ‌కీ, హిట్ 2 క‌థ‌కీ సంబంధం ఉండ‌ద‌ని, హీరో క్యారెక్ట‌ర్లు కూడా పూర్తి భిన్నంగా ఉంటాయ‌ని తెలుస్తోంది. హిట్ లో విశ్వ‌క్‌సేన్ చాలా ఎగ్ర‌సీవ్‌గా క‌నిపిస్తాడు. అయితే హిట్ 2లో అడ‌విశేష్ మాత్రం కూల్ అండ్ కామ్ గా ఉంటాడ‌ట. అంటే… హీరో ఇమేజ్‌ని బ‌ట్టి హిట్ ఫ్రాంచైజీలో పాత్ర‌లు మారిపోతుంటాయి.
