ఏపీ ఉప ముఖ్యమంత్రి పవన్ కళ్యాణ్ ప్రారంభించిన స్వచ్ఛ రథం కార్యక్రమానికి టాలీవుడ్ నేచురల్ స్టార్ నాని మద్దతు తెలపడం ఇప్పుడు సోషల్ మీడియాలో హాట్ టాపిక్ అయింది. పిఠాపురం నియోజకవర్గంలో పవన్ కళ్యాణ్ ప్రతిష్టాత్మకంగా స్వచ్ఛ రథం అనే కార్యక్రమాన్ని ప్రారంభించారు. తడి చెత్త, పొడి చెత్తను వేరు చేయడంపై ప్రజల్లో అవగాహన పెంచడమే దీని ప్రధాన ఉద్దేశం. కేవలం అవగాహనకే పరిమితం కాకుండా, చెత్తను సక్రమంగా అందించే పౌరులకు బహుమతులు, నిత్యావసర వస్తువులు కానుకగా ఇచ్చే విధానాన్ని ప్రవేశపెట్టారు. ఈ ఇన్సెంటివ్ మోడల్ ప్రజలను స్వచ్ఛందంగా భాగస్వాములను చేస్తోంది.

ఈ కార్యక్రమంపై నాని సోషల్ మీడియా వేదికగా స్పందిస్తూ హృదయపూర్వక అభినందనలు తెలిపారు. తడి చెత్త, పొడి చెత్తను వేరు చేయడంపై ప్రజల్లో అవగాహన కల్పించడం నిజంగా గొప్ప ఆలోచన. చెత్త ఇస్తే ప్రతిఫలంగా నిత్యావసరాలు, బహుమతులు ఇవ్వడం పౌరులను ఎంతగానో ప్రేరేపిస్తుంది. కళ్యాణ్ గారు.. మీకు నా శుభాకాంక్షలు. ఎప్పుడూ మీకు మద్దతుగా ఉండే కోట్లాది మందిలో నేను కూడా ఒకడిని అంటూ నాని ఎమోషనల్ వీడియో రిలీజ్ చేశారు.

నాని చేసిన ట్వీట్‌కు జనసేన అధికారిక సోషల్ మీడియా ఖాతాలతో పాటు పవన్ కళ్యాణ్ అభిమానులు కూడా విశేషంగా స్పందించారు. సమాజ హితం కోసం చేస్తున్న ఈ పోరాటంలో మీలాంటి ప్రతిభావంతులైన నటుల మద్దతు ఎంతో స్ఫూర్తినిస్తుంది అంటూ జనసేన కార్యకర్తలు రీ-ట్వీట్లు చేస్తున్నారు. పవన్ కళ్యాణ్ ప్రవేశపెట్టిన ఈ మార్పును కేవలం రాజకీయ కోణంలోనే కాకుండా, ఒక సామాజిక బాధ్యతగా గుర్తించినందుకు నానిపై ప్రశంసలు కురుస్తున్నాయి.