నాని సుడి మామూలుగా లేదు. తాను ప‌ట్టింద‌ల్లా బంగార‌మే. హీరోగా వ‌రుస‌గా హిట్లు కొడుతున్నాడు. త‌న మార్కెట్ పెంచుకొంటున్నాడు. మ‌రోవైపు నిర్మాత‌గానూ దూకుడుమీద ఉన్నాడు. త‌న బ్యాన‌ర్‌లో వ‌చ్చిన సినిమాల‌న్నీ కాసులు కురిపిస్తున్నాయి. `హిట్ 3`తో మ‌రో హిట్ త‌న ఖాతాలో వేసుకొన్న నాని.. ఇప్పుడు `పార‌డైజ్‌`పై దృష్టి పెట్టాడు. ‘ద‌స‌రా’ ఫేమ్ శ్రీ‌కాంత్ ఓదెల ద‌ర్శ‌క‌త్వం వ‌హిస్తున్న సినిమా ఇది. ఇటీవ‌లే ప‌ట్టాలెక్కింది. ఈలోగానే బిజినెస్ మొద‌లైపోయింది.

‘పార‌డైజ్‌’ ఆడియో రైట్స్‌ని స‌రిగ‌మ సంస్థ రూ.18 కోట్ల‌కు కొనేసింది. ఈ సినిమాకు సంబంధించిన ఒక్క పాట కూడా బ‌య‌ట‌కు రాలేదు. కేవ‌లం ఈమ‌ధ్య విడుద‌లైన గ్లింప్స్ చూసి, స‌రిగ‌మ సంస్థ ఆడియో రైట్స్ పై క‌ర్చీఫ్ వేసేసింది. ఈ చిత్రానికి అనిరుథ్ సంగీత ద‌ర్శ‌కుడు. ద‌క్షిణాదిన ఫామ్ లో ఉన్న సంగీత ద‌ర్శ‌కుడు అనిరుథ్‌. త‌న సినిమా అంటే పాట‌లు క‌చ్చితంగా బాగుంటాయ‌న్న న‌మ్మ‌కం ఉంది. పైగా నాని నిర్మాత‌గా సూప‌ర్ ఫామ్ లో ఉన్నాడు. `ద‌స‌రా` కాంబోలో రూపుదిద్దుకొంటున్న సినిమా ఇది. గ్లింప్స్ కు కూడా అనూహ్య‌మైన స్పంద‌న వ‌చ్చింది. నాని నెవ‌ర్ బిఫోర్ అవ‌తార్ అనేది అర్థ‌మైంది. అందుకే సినిమా ప‌ట్టాలెక్క‌గానే, ఆడియో రైట్స్ డీల్ క్లోజ్ అయిపోయింది. 2026 మార్చి 26న ఈ చిత్రాన్ని విడుద‌ల చేయ‌బోతున్నారు. అదే రోజున ‘పెద్ది’ కూడా విడుద‌ల అవుతున్న సంగ‌తి తెలిసిందే. ‘పెద్ది’ వ‌స్తే మాత్రం ‘పార‌డైజ్’ కాస్త వెన‌క్కి త‌గ్గే అవ‌కాశం ఉంది. లేదంటే మార్చి 26న రావ‌డం ప‌క్కా.