ఆంధ్రప్రదేశ్ విద్యా రంగంలో ఒక సరికొత్త ఒరవడికి నిడమర్రు జిల్లా పరిషత్ హైస్కూల్ వేదికగా నిలిచింది. రాష్ట్ర విద్యాశాఖ మంత్రి నారా లోకేష్ ప్రత్యేక చొరవతో, ప్రైవేటు కార్పొరేట్ పాఠశాలలకు ఏమాత్రం తీసిపోని విధంగా, అంతర్జాతీయ ప్రమాణాలతో ఈ పాఠశాలను తీర్చిదిద్దారు. కేవలం భవనాల రంగులు మార్చడం కాకుండా, మౌలిక సదుపాయాల్లో లోకేష్ మార్క్ స్పష్టంగా కనిపిస్తోంది.

అంతర్జాతీయ స్థాయి మౌలిక సదుపాయాలు:

నిడమర్రు ZPHS పాఠశాలను రూ.16 కోట్లతో ఇంటర్నేషనల్ గవర్నమెంట్ మోడల్ స్కూల్ గా తీర్చిదిద్దింది. ఐదు ఎకరాల్లో నిర్మిస్తున్న ఈ పాఠశాలలో సైన్స్ పార్క్, ఇండోర్ స్టేడియం, స్విమ్మింగ్ పూల్, ఓపెన్ థియేటర్ వంటి అత్యాధునిక వసతులు కల్పిస్తున్నారు. క్రీడల కోసం ఫుట్‌బాల్ గ్రౌండ్, రన్నింగ్ ట్రాక్‌లను కూడా ఏర్పాటు చేస్తున్నారు. నిడమర్రు హైస్కూల్‌లోకి అడుగుపెట్టగానే మనకు ఒక అత్యాధునిక క్యాంపస్ కనిపిస్తుంది. డిజిటల్ క్లాస్ రూమ్‌లు, అత్యాధునిక ల్యాబొరేటరీలు, విశాలమైన లైబ్రరీ ఇంటర్నెట్ సదుపాయంతో కూడిన కంప్యూటర్ ల్యాబ్స్ ఇక్కడ ప్రత్యేక ఆకర్షణ. విద్యార్థుల శారీరక దృఢత్వం కోసం అంతర్జాతీయ ప్రమాణాలతో కూడిన క్రీడా ప్రాంగణాన్ని కూడా అభివృద్ధి చేశారు. ప్రభుత్వ పాఠశాల అంటే ఉండే పాత భావజాలాన్ని చెరిపివేస్తూ, విద్యార్థులకు ఆహ్లాదకరమైన వాతావరణాన్ని కల్పించడంలో లోకేష్ విజయం సాధించారు.

లోకేష్ విజన్ – విద్యార్థే కేంద్రంగా:

ఈ పాఠశాల అభివృద్ధి వెనుక నారా లోకేష్ పక్కా ప్రణాళిక కనిపిస్తోంది. ప్రపంచస్థాయి విద్యను సామాన్య విద్యార్థులకు చేరువ చేయాలనే లక్ష్యంతో, స్వయంగా పర్యవేక్షించి ఈ ప్రాజెక్టును పూర్తి చేయించారు. ముఖ్యంగా టెక్నాలజీని విద్యతో అనుసంధానించడం, స్మార్ట్ బోర్డుల ఏర్పాటు , నాణ్యమైన ఫర్నిచర్ విషయంలో ఆయన ఎక్కడా రాజీ పడలేదు. నిడమర్రు స్కూల్ ఇప్పుడు ఏపీలోని మిగిలిన ప్రభుత్వ పాఠశాలలకు ఒక రోల్ మోడల్ గా నిలుస్తోంది. ఇలాంటివి వచ్చే ఐదేళ్లలో నియోజకవర్గానికి ఒక్కటి చొప్పున నిర్మించాలని అనుకుంటున్నారు.

భవిష్యత్తుకు భరోసా

నిడమర్రు స్కూల్ అభివృద్ధి కేవలం ఒక భవన నిర్మాణానికే పరిమితం కాలేదు. ఇది ప్రభుత్వ పాఠశాలలపై ప్రజల్లో ఉన్న నమ్మకాన్ని పెంచేలా ఉంది. పేద విద్యార్థులు కూడా గ్లోబల్ స్థాయిలో పోటీ పడేలా వారికి కావాల్సిన అన్ని వసతులను ఒకే చోట చేర్చడం విశేషం. ఈ పాఠశాల రూపురేఖలు చూస్తుంటే, రాబోయే రోజుల్లో ఆంధ్రప్రదేశ్ విద్యావ్యవస్థలో రానున్న విప్లవాత్మక మార్పులకు ఇది ఒక ఆరంభంలా అనిపిస్తోంది. నిడమర్రు జడ్పీ హైస్కూల్ లోకేష్ బ్రాండ్ అభివృద్ధికి ఒక సజీవ సాక్ష్యంగా నిలుస్తూ, విద్యార్థుల ఉజ్వల భవిష్యత్తుకు బాటలు వేస్తోంది.