రాజకీయ పార్టీలకు కార్యకర్తలే వెన్నెముక. ఎన్నికల సమయంలో క్షేత్రస్థాయిలో పార్టీ జెండాను మోసి, గెలుపు కోసం శ్రమించేది వారే. అయితే, ఆంధ్రప్రదేశ్ రాజకీయాల్లో ప్రధాన పార్టీలైన తెలుగుదేశం , జనసేన పార్టీలు కార్యకర్తలకు అండగా ఉంటూంటే వైఎస్సార్ కాంగ్రెస్ మాత్రం పట్టించుకున్న పాపాన పోదు. ఆ పార్టీ కార్యకర్తలకు కనీసం బీమా సౌకర్యం కూడా ఉండదు.

తెలుగుదేశం పార్టీది వ్యవస్థీకృత సంక్షేమం

దేశంలోనే తన కార్యకర్తల కోసం ప్రత్యేకంగా ఒక సంక్షేమ నిధిని ఏర్పాటు చేసిన మొదటి పార్టీగా టీడీపీ గుర్తింపు పొందింది. ప్రతి రెండేళ్లకు ఒకసారి క్రమం తప్పకుండా సభ్యత్వ నమోదు చేపడుతుంది. రూ. 100 తో సభ్యత్వం తీసుకున్న ప్రతి ఒక్కరికీ బీమా సౌకర్యం కల్పిస్తుంది. ప్రమాదవశాత్తు కార్యకర్త మరణిస్తే వారి కుటుంబానికి 5 లక్షల వరకు తక్షణ బీమా సాయం అందజేస్తారు. అలాగే శాశ్వత అంగవైకల్యం కలిగినా ఆర్థిక సాయం ఉంటుంది. కార్యకర్తల పిల్లల చదువుల కోసం ఒక్కో బిడ్డకు రూ.5,000 చొప్పున విద్యా సాయం, ప్రమాదంలో గాయపడితే రూ.50,000 వరకు వైద్య ఖర్చులను పార్టీ భరిస్తుంది. మంగళగిరిలోని పార్టీ కార్యాలయంలో దీని కోసం ప్రత్యేక విభాగాన్నే నడుపుతున్నారు.

జనసేన పార్టీ – జనసైనికులకు భరోసా

జనసేన పార్టీ కూడా టీడీపీ తరహాలోనే కార్యకర్తల సంక్షేమానికి అధిక ప్రాధాన్యత ఇస్తోంది. జనసేన క్రియాశీలక సభ్యత్వం తీసుకున్న ప్రతి జనసైనికుడికి 5 లక్షల ప్రమాద బీమా సౌకర్యం కల్పిస్తోంది. పవన్ కల్యాణ్ తన వ్యక్తిగత నిధుల నుండి కూడా భారీగా విరాళాలు ఇచ్చి ఈ సంక్షేమ నిధిని బలోపేతం చేశారు. పార్టీ కార్యకర్తలకు ఏదైనా ఆపద వస్తే పవన్ కల్యాణ్ స్వయంగా స్పందించడం, పార్టీ నాయకులు బాధిత కుటుంబాలను పరామర్శించి చెక్కులు అందజేయడం క్షేత్రస్థాయిలో కనిపిస్తుంది.

వైఎస్సార్ కాంగ్రెస్ పార్టీ – వాడుకుని వదిలేసే ధోరణి

వైసీపీ విషయంలో కార్యకర్తల సంక్షేమం గురించి తీవ్ర విమర్శలు వినిపిస్తున్నాయి. టీడీపీ, జనసేన తరహాలో వైసీపీలో క్రమబద్ధమైన సభ్యత్వ నమోదు ప్రక్రియ, ప్రత్యేక సభ్యత్వ కార్డుల పంపిణీ పెద్దగా కనిపించదు. ఫలితంగా ఎవరు అధికారిక కార్యకర్త అనే దానిపై స్పష్టత ఉండదు. ప్రమాదంలో చనిపోయిన కార్యకర్తల కోసం పార్టీ పరంగా శాశ్వత బీమా పథకం లేదా వెల్ఫేర్ ఫండ్ ఏదీ వైసీపీలో లేదు. జగన్ మోహన్ రెడ్డి కేవలం ఎన్నికల సమయంలోనే కార్యకర్తలను వాడుకుంటారని, గెలిచిన తర్వాత వారిని పట్టించుకోరని ఆ పార్టీలోనే అసంతృప్తి ఉంటుంది. జనసమీకరణకు తప్ప కార్యకర్తలకు అసలు విలువే ఉండదు.

టీడీపీ, జనసేన పార్టీలు తమ కార్యకర్తలను సొంత కుటుంబ సభ్యులు గా భావిస్తూ, వారు లేకపోయినా వారి కుటుంబాలు రోడ్డున పడకుండా వ్యవస్థీకృతమైన బీమా సౌకర్యాలు కల్పిస్తున్నాయి. కానీ వైసీపీ మాత్రం పార్టీ కోసం రక్తం చిందించే కార్యకర్తలకు ఒక భరోసా కల్పించడంలో వెనుకబడి ఉంది. జగన్ రెడ్డి పని ముగిశాక వదిలేయడం అనే విధానాన్నే ఎక్కువగా పాటిస్తున్నారు.