ఏపీలో సాక్షి మీడియా క్లోన్ చానల్స్ గా పేరు తెచ్చుకున్నాయి టీవీ 9 , ఎన్టీవీ.. ఈ రెండింటి పని… ప్రతిపక్షంపై యుద్ధం చేయడమే. అధికార పక్షానికి బాకా ఊదడమే. అయితే ఇందు కోసం న్యూస్ ఫేక్ చేసే స్థాయికి దిగజారిపోవడమే ఇప్పుడు తెలుగు మీడియాలో అత్యంత బాధాకమైన విషయం. దీనికి తాజా ఉదాహరణ నాగబాబు విషయంలో.. ఎన్టీవీ చేసింది. దీంతో ఎన్టీవీ వైపు అందరూ అదోలా చూసే పరిస్థితి ఏర్పడింది.
పొత్తులపై పవన్ కల్యాణ్ నిర్ణయం తీసుకుంటారని… పొత్తులు ఫైనల్ అయిన తర్వాత ఎవరెవరు ఎక్కడ పోటీ చేస్తారనేది నిర్ణయం తీసుకుంటామని కర్నూలు పర్యటనలో నాగబాబు మీడియా ప్రతినిధులకు చెప్పారు. ఎన్టీవీ ప్రతినిధికి కూడా అదే చెప్పారు. కానీ ఎన్టీవీ ప్రతినిధి పొత్తులు లేకుండా ఒంటరిగా 175 స్థానాలు పోటీ చేస్తున్నట్లుగా ప్రకటించేసింది. ఆన్ లైన్‌లోనే కాదు.. ఆఫ్ లైన్ … లైవ్ లో కూడా అదే చెప్పింది. ఒక్కచోట ఏదో తప్పు జరిగిందో అనుకోవచ్చు.. కానీ పదే పదే అదే ప్రచారం చేసింది. దీంతో సహజంగానే నాగబాబు అలా అన్నారా అని అందరూ ఆరా తీశారు. ఈ వ్యవహారం జనసేన వర్గాల్లోనూ కలకలం రేపింది.
అసలు నాగబాబు ఏమన్నారో తెలిసిన తర్వాత.. అందరు ఎన్టీవీ విషయంలో.. ఎంతకు తెగించార్రా అనుకోవడం కామన్ అయిపోయింది. ఇదే విషయాన్ని నాగబాబు కూడా తన సోషల్ మీడియా ఖాతాలో పోస్ట్ చేశారు. అసలు తానేమన్నారు.. ఎన్టీవీ ఏం చెప్పిందో .. టూ విండో వీడియోలు పోస్ట్ చేశారు. దీంతో ఎన్టీవీ పరువు మరింత గంగలో కలిసిపోయినట్లయింది.
ఎన్టీవీకి వైసీపీ దగ్గరే. ఆ చానల్ కు ఏపీలో విపక్షాలు కలిసి పోటీ చేయకూడదని.. జగన్ మళ్లీ గెలవాలని ఉండొచ్చు. అందులో తప్పేం లేదు. సాక్షికి కూడా అలాగే ఉంటుంది. టీవీ9కికూడా అలాగే ఉంటుంది . కానీ ఇలా ఫేక్ చేసి.. ఏదో రాజకీయ ట్విస్టులు ఇవ్వాలనుకుంటే.. ముందుగా పోయేది మీడియా సంస్థ పరువే. ఇప్పటికే అది చాలా వరకూ గంగలో కలిసిపోయింది. నాగబాబు ఇష్యూతో మరింతగా పోయింది. ఇప్పుడు మాది ప్రతిక్షణం ప్రజాహితం అని చెప్పుకుంటే.. కామెడీ అయిపోయేలా ఆ చానల్ తీరు మారిపోయిందని కామెంట్స్ సహజంగానే వస్తూంటాయి.
