పింక్ రీమేక్‌తో మ‌ళ్లీ రీ ఎంట్రీ ఇచ్చాడు ప‌వ‌న్ కల్యాణ్. ఇంత‌లోనే మరో సినిమాకీ ప‌చ్చ జెండా ఊపేశాడు. క్రిష్ ద‌ర్శ‌క‌త్వంలో ప‌వ‌న్ కల్యాణ్ ఓ సినిమా చేయ‌నున్న సంగ‌తి తెలిసిందే. ఈ సినిమాకీ ముహూర్తం ఫిక్స‌యిపోయింది. ఈనెల 27న క్రిష్ సినిమాకి కొబ్బ‌రి కాయ కొట్ట‌నున్నారు. ఫిబ్ర‌వ‌రిలో గానీ, మార్చిలోగానీ చిత్రీక‌ర‌ణ ప్రారంభం అవుతుంది. ఏ.ఎం.రత్నం నిర్మాత‌గా వ్య‌వ‌హ‌రిస్తారు.మ‌హమ్మ‌దీయుల ప‌రిపాల‌నా కాలం నాటి క‌థ ఇది. అప్ప‌టి క‌ట్ట‌డాల‌ని పోలిన సెట్స్‌ని రూపొందించాల్సివుంది. అందుకు సంబంధించిన ప‌నులు మొద‌ల‌య్యాయి కూడా. ఈలోగా న‌టీన‌టులు, ఇత‌ర సాంకేతిక నిపుణుల ఎంపిక కోసం క్రిష్ క‌స‌ర‌త్తు చేస్తున్నారు. ఇందులో ఇద్ద‌రు క‌థానాయిక‌ల‌కు చోటుంది. అందుకోసం బాలీవుడ్ క‌థానాయిక‌ల పేర్లు ప‌రిశీలిస్తున్నారు. పాన్ ఇండియా సినిమాగా ఈ చిత్రాన్ని విడుద‌ల చేయ‌నున్నారు. అందుకే వివిధ భాష‌ల నుంచి న‌టీన‌టుల్ని ఎంచుకునే ప‌నిలో ఉంది చిత్ర‌బృందం. ప్ర‌తినాయ‌కుడి పాత్ర కోసం కూడా బాలీవుడ్ న‌టుల పేర్లు ప‌రిశీలిస్తున్నారు. బుర్రా సాయిమాధ‌వ్ ఈ చిత్రానికి సంభాష‌ణ‌లు అందిస్తున్నారు.
ప‌వ‌న్ తో క్రిష్… ముహూర్తం ఫిక్స్‌
