RRR త‌ర‌వాత రాజమౌళి సినిమా ఏమిట‌న్న విష‌యంలో ఎవ‌రికీ ఎలాంటి క‌న్‌ఫ్యూజ‌న్ లేదు. ఎందుకంటే మహేష్ బాబుతో రాజమౌళి సినిమా ఫిక్స‌యిపోయింది. అయితే… RRR కీ, మహేష్ బాబు సినిమాకీ మ‌ధ్య‌లో రాజమౌళి మరో సినిమా చేసేస్తున్నాడ‌న్న‌ది అత్యంత విశ్వ‌స‌నీయ వ‌ర్గాల స‌మాచారం.
మ‌హేష్‌ప్ర‌స్తుతం `స‌ర్కారు వారి పాట` చేస్తున్నాడు. 2022 జ‌న‌వ‌రిలో విడుద‌ల అవుతుంది. ఆ త‌ర‌వాత మహేష్ కాస్త గ్యాప్ తీసుకుంటాడు. అంటే.. మహేష్ మరో సినిమా చేయ‌డానికి క‌నీసం 6 నెల‌ల స‌మ‌యం ఉంటుంది. ఈ గ్యాప్ ని రాజమౌళి మ‌రోలా వాడుకోవాల‌ని చూస్తున్నాడు. అతి తక్కువ స‌మ‌యంలో, అతి తక్కువ బడ్జెలో ఓ ప్ర‌యోగాత్మ‌క సినిమా చేయాల‌న్న‌ది రాజమౌళి ఆలోచ‌న. ఈ సినిమాని పూర్తిగా బాలీవుడ్ న‌టీన‌టులు, సాంకేతిక నిపుణ‌ల‌తో రూపొందించ‌నున్నాడ‌ట. కేవ‌లం నెల రోజుల్లో షూటింగ్ పూర్తి చేసి, మరో నెల రోజుల్లో పోస్ట్ ప్రొడ‌క్ష‌న్ కి కేటాయించి, ఒక నెల ప్ర‌మోష‌న్లు గ‌ట్టిగా చేసి సినిమా విడుద‌ల చేయాల‌న్న ఆలోచ‌న రాజ‌మౌళిది. అయితే ఈ సినిమాకి తాను ద‌ర్శ‌క‌త్వం వ‌హిస్తాడా? లేదంటే ద‌ర్శ‌క‌త్వ పర్య‌వేక్ష‌కుడిగా ఉంటాడా? అనేది ఇంకా తెలీదు. అప్ప‌ట్లో `ఈగ` సినిమా కూడా రాజమౌళి ప్ర‌యోగాత్మ‌కంగానే తెర‌కెక్కించాడు. కాక‌పోతే… క్ర‌మంగా బ‌డ్జెట్ పెరిగి, అది కూడా పెద్ద సినిమా అయిపోయింది. అలాంటి ఓ చిన్న క‌థ, స్టార్ల హంగామా అవ‌స‌రం లేని క‌థ‌తోనే రాజమౌళి ఈ ప్ర‌యోగానికి దిగుతున్న‌ట్టు టాక్‌.
