శామీర్పేట్ పోలీస్‌స్టేషన్ పరిధిలోని సెలబ్రిటీ రిసార్ట్‌లోని ఓ ప్రైవేట్‌ విల్లాలో రేవ్ పార్టీ నిర్వహిస్తున్న పక్కా సమాచారంతో… ఎన్ఓటీ పోలీసులు దాడి చేశారు. అక్కడ అమ్మాయిలతో కలిసి అశ్లీల కార్యకలాపాలకు పాల్పడుతున్న వారిని అదుపులోకి తీసుకున్నారు. పట్టుబడినవారిలో ఏడుగురు డాక్టర్లున్నారు. వీరితోపాటు నలుగురు యువతుల్ని అదుపులోకి తీసుకున్నారు. వీరందరినీ శామీర్పేట్ పోలీస్‌స్టేషన్‌కి తరలించారు. రేవ్‌పార్టీలో పట్టుబడిన డాక్టర్లంతా… గజ్వేల్ ప్రాంతానికి చెందినవారని పోలీసులు తేర్చారు. వీరంతా వివిధ ప్రాంతాలకు చెందిన యువతులతో అశ్లీల నృత్యాలు చేస్తూ పోలీసులకు రెడ్‌హ్యాండెడ్‌గా చిక్కారు. వైద్యులు అయివుండి కూడా హద్దులు దాటిన వ్యసనం అనైతికం అని మరిచారు.
అంతేకాక… తమతో అశ్లీలంగా గడపడానికి వచ్చిన అమ్మాయిలకు హెచ్ఐవీ టెస్ట్‌లు చేశారు. అక్కడ లభించిన హెచ్ఐవీ టెస్ట్ కిట్‌లను కూడా పోలీసులు స్వాధీనం చేసుకున్నారు. హైదరాబాద్‌లో రెండేళ్ల క్రితం నుంచి మొదలైన రేవ్ పార్టీ కల్చర్‌ను ఎప్పటికప్పుడు పోలీసులు అణచివేస్తున్నప్పటికీ… అదేమీ పట్టించుకోకుండా సెలబ్రిటీ రిసార్ట్‌లో మరొకదాన్ని పెద్దఎత్తున జరపడాన్ని పోలీసులు సీరియస్‌గా తీసుకుని దర్యాప్తు చేశారు. దీంతో ఈ రేవ్ పార్టీలో మరో కోణం బయటపడింది.
ఓ ఫార్మా కంపెనీ… తమ సొంత ఖర్చుతో డాక్టర్లకు ఈ రేవ్ పార్టీని ఏర్పాటు చేసినట్లు పోలీసుల విచారణలో వెల్లడైంది. సాధారణంగా ఫార్మా కంపెనీలే కాకుండా, ఇతర వ్యాపార సంస్థలు కూడా… తమ ఉత్పత్తులను ప్రమోట్ చేసుకోవడానికి గెట్ టు గెదర్ పార్టీలు ఇస్తుంటాయి. ఇక రేవ్ పార్టీ అంటేనే విందు, మందు, పొందు అని అంటుంటారు. అలాంటి దాన్ని వైద్యులకు ఓ ఫార్మా కంపెనీ ఏర్పాటు చేయడం చర్చనీయాంశం అయింది. తమ వ్యాపారాన్ని పెంచుకునేందుకు… ఓ ఔషధ తయారీ కంపెనీ ఇంతలా దిగజారడంపై పోలీసులు విస్మయం వ్యక్తం చేస్తున్నారు. అయితే రేవ్ పార్టీని ఏ ఫార్మా కంపెనీ ఏర్పాటు చేసింది? పట్టుబడిన వైద్యుల పేర్లు వెల్లడించడానికి పోలీసులు నిరాకరించారు. ఫార్మా కంపెనీ యాజమాన్యంతోపాటు అరెస్టయిన వైద్యులు… తమ పలుకుబడితో పేర్లు బయటకు రాకుండా పోలీసులను మేనేజ్ చేసుకున్నారు.
