సినిమాకి టాక్ చాలా ముఖ్యం. పాజిటీవ్ టాక్ వ‌స్తే – క‌ల‌క్ష‌న్లు వ‌స్తాయి. ఏమాత్రం తేడా వ‌చ్చినా – ఫ‌ట్‌మ‌న‌డం ఖాయం. రిలీజ్ డే టాక్ అనేది వ‌సూళ్ల‌లో కీల‌క పాత్ర పోషిస్తుంటుంది. సినిమాపై న‌మ్మ‌కం ఉన్న‌వాళ్లు మాత్రం ప్రీమియ‌ర్స్ షోల‌తో కాస్త హ‌డావుడి చేస్తుంటారు. ఒక రోజు ముందు మీడియాకీ, సెల‌బ్రెటీల‌కూ ప్రీమియర్ షో వేయ‌డం మామూలే. అయితే పూరి మాత్రం రెండ్రోజుల ముందే – ప్రీమియ‌ర్స్ కి ఏర్పాట్లు చేసుకుంటున్నాడు.
పూరి జ‌గ‌న్నాథ్ నిర్మాత‌గా వ్య‌వ‌హ‌రించిన చిత్రం `రొమాంటిక్`. ఈ చిత్రానికి పూరి క‌థ, మాట‌లు, స్క్రీన్ ప్లే కూడా అందించాడు. ఈనెల 29న విడుద‌ల అవుతోంది. అయితే రెండ్రోజుల ముందే అంటే ఈనెల 27న రొమాంటిక్ స్పెష‌ల్ ప్రీమియ‌ర్స్‌ప‌డ‌బోతున్నాయి. హైద‌రాబాద్ లోని ఏఎంబీ మాల్ లో బుధ‌వారం రాత్రి 8 గంట‌ల‌కు రొమాంటిక్ స్పెష‌ల్ స్క్రీనింగ్ జ‌ర‌గ‌బోతోంది. టాలీవుడ్ లోని సెల‌బ్రెటీలంతా ఈ షోకి హాజ‌రు కాబోతున్నారు. మీడియాకు మరో షో ఉంది. రెండు రోజుల ముందే ప్రీమియ‌ర్స్ అంటే గట్స్ ఉండాలి. ఎందుకంటే ఈలోగా టాక్ ప్ర‌పంచమంతా పాకేస్తుంది. ఈ టాక్ ని బ‌ట్టే సినిమా చూడాలా, వ‌ద్దా? అనేది కొంత‌మంది డిసైడ్ చేసుకుంటారు. 29న రొమాంటిక్ తోపాటుగా వ‌రుడు కావ‌లెను కూడా వ‌స్తోంది. ఈ రెండింటి మ‌ధ్య మంచి పోటీ ఉంది. కాబ‌ట్టి.. ప్రీమియ‌ర్స్ వేయ‌డం సాహ‌సోపేత‌మైన నిర్ణ‌య‌మే.
