ప్రపంచాన్ని వణికిస్తోన్న మహమ్మారిని అడ్డుకునేందుకు రష్యా తొలి వ్యాక్సిన్ ను తీసుకువచ్చింది. ఈ టీకాను మొదట తన కుమార్తెకు వేయించారు రష్యా అధినేత పుతిన్. ముందుగా వైద్య సిబ్బంది, ఉపాధ్యాయులు, చిన్నారులకు ఆ తర్వాత ప్రజలకు వ్యాక్సిన్ వేస్తారని ప్రకటించారు. దీంతో కరోనా వ్యాక్సిన్‌ను రిజిస్టర్ చేసిన తొలి దేశంగా రష్యా నిలిచింది. అయితే వ్యాక్సిన్‌పై ప్రపంచ ఆరోగ్య సంస్థ అనుమానాలు వ్యక్తం చేస్తోంది. ప్రమాణాల ప్రకారం.. మూడు దశల్లో ట్రయల్స్ సరిగా నిర్వహించలేదని, పైపైన పరీక్షలు జరిపి… హడావుడిగా వ్యాక్సిన్ రిలీజ్ చేశారనే అంటోంది.
ఈ వ్యాక్సిన్ మొదటి దశలో జూన్ 17న 76 మంది వాలంటీర్లకు వ్యాక్సిన్ ఇచ్చింది. రెండు నెలలు కూడా పూర్తి కాకుండానే మూడో దశను ముగించేసింది. నిబధనల ప్రకారం ఇంత త్వరగా చేయడం సాధ్యం కాదు. ప్రపంచ వ్యాప్తంగా ఇప్పటికే వంద రకాల వ్యాక్సిన్లు ట్రయల్ దశలో ఉన్నాయి.. వాటిలో ఆరు మాత్రమే ప్రపంచ ఆరోగ్య సంస్థ వద్ద నమోదు చేయించుకున్నాయి. అవి కూడా మూడో దశ ట్రయల్స్ నడుస్తున్నాయి. వాటి ఫలితాలను బట్టి అవి సక్సెస్ అయ్యాయా లేదా అని తెలుస్తుంది… అప్పుడే వ్యాక్సిన్ కు తుది అనుమతులు లభిస్తాయి.
రష్యా వ్యాక్సిన్‌కు స్పుత్నిక్ వీ అనే పేరు పెట్టింది. ఈ వ్యాక్సిన్‌నను బాడీకి ఇవ్వగానే కరోనా వైరస్ చుట్టూ ఉండే కొవ్వుతో కూడిన ముళ్లను నాశనం చేస్తుందని తెలిపింది. ఆ కొవ్వు, ముళ్లూ పోతే… కరోనా బతకదు. తాము తయారు చేస్తున్న వ్యాక్సిన్ కూడా ఇలాగే పనిచేస్తుందని, రష్యా తమ ఫార్ములాను హైజాక్‌ చేసిందని చైనాలో కాన్సినో బయోలాజిక్స్ ఆరోపించడం ఇందులోని కొసమెరుపు. ఒక్క చైనానే కాదు.. అమెరికా, యూకే, కెనడా కూడా రష్యాపై మండిపడుతున్నాయి. తమ వద్ద నుంచి వ్యాక్సిన్ ఫార్ములాను దొంగిలించిందని అంటున్నాయి.
