సెటైర్: తమ్ముళ్లూ గట్టిగా చప్పట్లు కొట్టండి..

`తమ్ముళ్లూ మీరు చెప్పండి అవునా, కాదా…చెప్పండి తమ్ముళ్ళూ.. అవును అయితే గట్టిగా చప్పట్లు కొట్టండి ‘ అని బాబుగారూ మైకు పుచ్చుకుని అనగానే, తమ్ముళ్లంతా చప్పట్లు కొట్టారు.

బాబుగారిలో ఉత్సాహం కట్టలు త్రెంచుకుంది. ప్రసంగం కొనసాగిస్తూ…

`అదే మాదిరిగా మనమంతా ముందుకుపోదాం…’

అనగానే ఎదురుగా కూర్చున్న తమ్ముళ్లకు అర్థంకాలేదు. విషయమేమిటో చెప్పకుండా `అదే మాదిరిగా ముందుకుపోవడమే’మిటో వాళ్లకు తెలియలేదు. అయినా బాబుగారు ఏదో ముందుచూపుతో చెబుతున్నప్పుడు అడ్డం తగలడం మంచిదికాదని, `అలాగే, ముందుకుపోదాం’ అంటూ తలలూపారు.

`తమ్ముళ్లూ మీకు మీ అమ్మా,నాన్న పేర్లు తెలుసు. కానీ మీ ముత్తాత, ముత్తవ్వ పేర్లు తెలుసా? అని అడుగుతున్నాను’

తమ్ముళ్లు మరోసారి అయోమయం ఫేస్ పెట్టారు. తెలియదంటూ పెదవివిరిచారు.

`అదేమాదిరిగా చెబుతున్నాను, తమ్ముళ్లూ, మన పూర్వీకుల గురించి మనం తెలుసుకోవాలి. ఇప్పుడు నేను బాగా స్టడీ చేస్తున్నాను. మన చరిత్ర , మన సంస్కృతి అర్థం చేసుకుంటున్నాను. మన రాష్ట్ర రాజధానికి అమరావతి అని పేరుపెట్టాం. ఇప్పుడు రాజమండ్రిని రాజమహేంద్రవరంగా మార్చేస్తున్నాం’

ఒక తమ్ముడివైపు చూస్తూ…

`తమ్ముడూ, నీకు నన్నయ తెలుసా ? నీకు రాజరాజనరేంద్రుడు తెలుసా? ఇంకా…’

వరుస ప్రశ్నలు రావడంతో పరీక్షహాల్లో కూర్చున్నట్టు ఫీలైపోయాడు సదరు తమ్ముడు.

`చూశారా, ఈ తమ్ముడికి తెలియదు.(అదోలా నవ్వుతూ) ఈ మధ్యనే మిత్రులు చెప్పారు. ఇంకో పక్కన, వెయ్యేళ్లు దాటినా రాజరాజనరేంద్రుడిని అంతా గుర్తుపెట్టుకున్నారని తెలిసింది, అదేమాదిరి మనం ముందుకుపోదాం. ముందుతరాల వాళ్లు గ్యారంటీగా తెలుసుకోవాలి, అందుకు ప్రయత్నం చేయాల్సి ఉంది… మనం బాగా చేశాం..’

మాటల మధ్య ఎక్కడో లింక్ లు జారిపోతున్నాయన్న విషయం మాత్రం క్రిందకూర్చున్న తమ్ముళ్లకు అర్థమవుతోంది. బాబుగారి ఆలోచన ఏమిటో, ఆ విజన్ ఏమిటో, ముందుచూపో, వెనక చూపో..తమ్ముళ్ల చిట్టి బుర్రలకు అర్థంకాక మరోసారి బుర్ర గోక్కున్నారు.

`అవునా,తమ్ముళ్లూ, మనం బ్రహ్మాండంగా ముందుకుపోతున్నాం. ఎంత ముందుకుపోయినా చరిత్ర మరచిపోకూడదు. వెనకటి రాజ్యాలు మళ్ళీ వస్తాయని మరువకూడదని తెలియజేస్తున్నా…’

తమ్ముళ్లకు మళ్ళీ అర్థంకాలేదు. వెనకటి రాజ్యమా…! వెనకటి రాజ్యమంటే… ఇలా అనుకుంటూ వాళ్లు వెంటనే అరచేయి చూసుకుని ఉలిక్కిపడ్డారు. అమ్మో మళ్ళీ హస్తం వస్తుందా ఏమిటీ? కంగారుపడ్డారు.

బాబు ఇంకా…`అలాంటి వారిని మనం గుర్తుచేసుకోవాలి. ఎన్నో విషయాల్లో ముందుకుపోదాం, వెనక్కివెనక్కి చూసుకుంటూ పోదాం… తమ్ముళ్లూ గట్టిగా చప్పట్లు కొట్టండి..’

ఇలా అనగానే ఇది మాత్రం తమకు సరిగా అర్థమైందనుకున్న తమ్ముళ్లు గట్టిగా, ఇంకాస్త గట్టిగా మరికాస్త గట్టిగా తప్పట్లు కొట్టారు. ఆ తప్పట్ల హోరులో బాబుగారి మాటలు కలసిపోతున్నాయి.

– కణ్వస

Telugu360 is always open for the best and bright journalists. If you are interested in full-time or freelance, email us at [email protected]