శేఖర్ రెడ్డి … ఈ పేరు తెలియని రాజకీయవర్గాలుండవు, ముఖ్యంగా టీటీడీ వ్యవహారాలపై ఆసక్తి ఉన్న ఎవరూ మర్చిపోరు. తమిళనాడుకు చెందిన ఇనుక కాంట్రాక్టర్ అయిన శేఖర్ రెడ్డి.. తిరుమలతోనే తన అనుబంధం ఎక్కువ కొనసాగిస్తారు. ఇప్పుడు ఆయన తిరుమలలో అత్యంత విలాసవంతమైన ఓ కాటేజీని నిర్మించారు. శ్రీ భాగ్య అనే పేరు పెట్టారు. ప్రారంభానికి తమిళనాడు గవర్నర్ టి.ఎన్. రవి వచ్చారు.
భాగ్య వసతి భవనం వద్ద ప్రత్యేక హోమం, సుదర్శన హోమం, వాస్తు హోమం నిర్వహించారు. వేద పండితుల మంత్రోచ్ఛారణల మధ్య రిబ్బన్ కట్ చేసి భవనాన్ని ప్రారంభించారు. భవనం లోపల శ్రీవారికి ప్రత్యేక పూజలు నిర్వహించారు. తన కుటుంబం తరపున శ్రీనివాసునికి సమర్పించిన ఈ భవనం భక్తులకు సేవ చేస్తుందని శేఖర్ రెడ్డి సంతోషం వ్యక్తం చేశారు. టీటీడీ బోర్డు సభ్యుడిగా ఉన్నప్పుడు చేయాలనుకున్న కార్యం ఇప్పుడు పూర్తయిందన్నారు.
టీడీపీ హయాంలో ఓ సారి టీటీడీ బోర్డు మెంబర్ గా ఉన్నప్పుడు కేంద్రం పెద్ద నోట్లను రద్దు చేసింది. ఆ సమయంలో ఆయన ఇంట్లో కొత్త రెండువేల నోట్ల కట్టలు పెద్ద ఎత్తున సీబీఐకి దొరికాయి. ఒక్క నోటు కోసం జనం క్యూ లైన్లలో ఉంటే ఆయన ఇంట్లో ఇంత పెద్ద మొత్తం నగదు ఎలా వచ్చిందని దేశవ్యాప్తంగా గగ్గోలు రేగింది. దీంతో ఆయనను పదవి నుంచి తప్పించారు. అప్పట్లో ఆయన లోకేష్ బినామీ అని వైసీపీ నేతలు ఆరోపించారు.
తర్వాత వైసీపీ అధికారంలోకి వచ్చాక మళ్లీ టీటీడీ బోర్డు మెంబర్ గా నియమించారు. తర్వాత టీటీడీ సలహాదారుగా తమిళనాడుకు నియమించారు. ఐదు సంవతర్సాల పాటు టీటీడీని నడిపించిన జగన్ బంధువు ధర్మారెడ్డి కుమారుడ్ని.. తన కుమార్తెకు ఇచ్చి పెళ్లి చేయాలని నిర్ణయించారు. అయితే పెళ్లికి ముందు ధర్మారెడ్డి కుమారుడు హఠాత్తుగా చనిపోవడంతో ఆ బంధుత్వం కలవలేదు. కానీ ఆయన తిరుమలలో తన పలుకుబడిని కొనసాగిస్తూనే ఉన్నారు.
