హైదరాబాద్: షారుక్ ఖాన్, కాజల్ సుదీర్ఘ విరామం తర్వాత మళ్ళీ జంటగా నటిస్తున్న ‘దిల్‌వాలే’ చిత్రం ఈ నెల 18న విడుదలకు సిద్ధమయింది. షారుక్ భార్య గౌరి ఈ చిత్రాన్ని ‘రెడ్ చిల్లీస్ ఎంటర్‌టైన్‌మెంట్స్’ బ్యానర్‌పై నిర్మిస్తున్నారు. యాక్షన్ చిత్రాలకు పేరుగాంచిన రోహిత్ షెట్టి దర్శకత్వం వహిస్తున్నారు. షారుక్-రోహిత్ కాంబినేషన్‌లో గతంలో వచ్చిన ‘చెన్నై ఎక్స్‌ప్రెస్’ విజయవంతమవటం, షారుక్-కాజోల్ హిట్ కాంబినేషన్ మళ్ళీ కుదరటం వంటి కారణాలతో ‘దిల్‌వాలే’కు విపరీతమైన క్రేజ్ వ్చచింది. శాటిలైట్ రైట్స్‌కోసం ప్రముఖ టీవీ ఛానల్స్ పోటీ పడగా మల్టీ స్క్రీన్ మీడియా సంస్థ రు.60 కోట్లకు దక్కించుకుంది. ఇండియాలో శాటిలైట్స్ రైట్స్ విషయంలో ఇదే అత్యధిక మొత్తం. ఇక ఆడియో రైట్స్‌ను సోనీ సంస్థ ఎప్పుడో రు.19 కోట్లు ఇచ్చి తీసేసుకుంది. ఇప్పటికే రు.79 కోట్లు వచ్చేశాయి. నిర్మాణ ఖర్చు రు. 100 కోట్లలో ముప్పావు భాగం వచ్చేసినట్లయింది. ఈ చిత్రం అత్యధిక శాతం రామోజీ ఫిల్మ్ సిటీలోనే షూటింగ్ జరుపుకున్న సంగతి తెలిసిందే. వరుణ్ ధావన్, కృతి సనన్ యువజంటగా నటించారు.
మరోవైపు ఈ చిత్రం విడులవుతున్న రోజే సంజయ్ లీలా భన్సాలీ రణవీర్ సింగ్, దీపికా పదుకోన్, ప్రియాంకచోప్రాలతో తీసిన భారీ చారిత్రక కథా చిత్రం ‘బాజీరావ్ మస్తానీ’ కూడా విడుదలవుతోంది. గతంలో కూడా సంజయ్ లీలా భన్సాలీకి, షారుక్‌కు పోటీ ఏర్పడింది. షారుక్ ‘ఓం శాంతి ఓం’, భన్సాలీ ‘సావరియా’ 2007 నవంబర్ 7న ఒకేరోజు విడుదలయ్యాయి. వీటిలో ఓం శాంతి ఓం హిట్ కాగా, సావరియా ఫ్లాప్ అయింది. మరి ఇప్పుడేమవుతుందో చూడాలి.
