శంక‌ర్ టైమ్ ఏమీ బాగాలేదు. అన్నీ వ‌రుస ఎదురు దెబ్బ‌లే. `భార‌తీయుడు 2` ఆగిపోయింది. ఆ చిత్రాన్ని నిర్మిస్తున్న లైకా ప్రొడక్ష‌న్స్‌తో గొడ‌వ‌లు, కోర్టు కేసులు మొద‌ల‌య్యాయి. `అప‌రిచితుడు` మొద‌లెట్టిన రోజే.. మరో షాక్ త‌గిలింది. నిర్మాత ర‌విచంద్ర‌న్ శంక‌ర్ పై నిప్పులు చెరిగారు. భార‌తీయుడు 2 పూర్త‌య్యేంత వ‌ర‌కూ.. రామ్ చ‌ర‌ణ్ సినిమాని ప‌ట్టాలెక్కించడం ఇప్పుడు క‌ష్టంగా మారింది. `అప‌రిచితుడు` హిందీ రీమేక్ మొద‌ల‌వుతుందో, లేదో ఇంకా తెలీదు.
అయితే.. ‘భార‌తీయుడు 2’ మాత్రం ఆగిపోలేద‌ట. ఈసినిమా త‌ప్ప‌కుండా పూర్త‌వుతుంద‌ని శంక‌ర్ చెబుతున్నారు. భార‌తీయుడు 2 పూర్తి చేశాకే.. శంక‌ర్ మిగిలిన సినిమాలు మొద‌లెట్టాల‌ని లైకా కోర్టుకెక్కిన సంగ‌తి తెలిసిందే. దీనిపై చెన్నై కోర్టులో వాద ప్ర‌తివాద‌న‌లు జ‌రుగుతున్నాయి. భార‌తీయుడు 2 సినిమా ఆగిపోలేద‌ని, ఆ సినిమా కోసం విదేశీ నిపుణులు రావాల్సి ఉంద‌ని, కోవిడ్ భ‌యాల‌తో.. వాళ్లు ఇండియాలో అడుగుపెట్ట‌డానికి భ‌య‌పెడుతున్నార‌ని, వాళ్లొచ్చాక… ఈ సినిమా షూటింగ్ య‌ధావిధిగా మొద‌ల‌వుతుంద‌ని శంక‌ర్ త‌ర‌పు న్యాయ‌వాది కోర్టుకు చెప్పారు. జూన్ నుంచి.. కమ‌ల్ హాస‌న్ డేట్లు ఇచ్చే అవ‌కాశం ఉంద‌ని, ఆయన ఓకే అంటే.. షూటింగ్ వెంట‌నే మొద‌లైపోతుంద‌ని శంక‌ర్ త‌ర‌పున న్యాయ‌వాది కోర్టుకు విన్న‌వించారు. ఇప్పుడు జూన్‌లో షూటింగ్ మొద‌లెట్ట‌డానికి.. లైకా నిర్మాత‌లు కూడా రెడీగా ఉన్నార‌ని స‌మాచారం. ఆ విదేశీ నిపుణుల్ని ర‌ప్పించే బాధ్య‌త కూడా శంక‌ర్ స్వ‌యంగా తీసుకున్న‌ట్టు తెలుస్తోంది. సో.. భార‌తీయుడు 2 మ‌ళ్లీ ప‌ట్టాలెక్కుతుంద‌న్న మాట.
