హైదరాబాద్‌తో పాటు ఫ్యూచర్ సిటీకి ప్రత్యేకమైన గుర్తింపు తీసుకురావాడనికి ముఖ్యమంత్రి ఏ. రేవంత్ రెడ్డి వినూత్న ప్రతిపాదనతో ముందుకు వచ్చారు. ఇప్పటికే అంతర్జాతీయ ఖ్యాతి గడించిన హైదరాబాద్ కు మరింతగా గ్లోబల్ మ్యాప్ లో చోటు కల్పించేలా ఆలోచన చేశారు. అందుకు అనుగుణంగా ప్రపంచ ప్రఖ్యాత వ్యక్తులు, కంపెనీల పేర్లను హైదరాబాద్ లో ప్రధాన రహదారులకు పెట్టాలని నిర్ణయించారు.

ఫ్యూచర్ సిటీ రోడ్డుకు టాటా పేరు

నెహ్రూ ఔటర్ రింగ్ రోడ్ వద్ద రావిర్యాలను నుంచి ప్రారంభమై ప్రతిపాదిత ఫ్యూచర్ సిటీని అనుసంధానం చేసే 100 మీటర్ల గ్రీన్‌ఫీల్డ్ రేడియల్ రోడ్డుకు పద్మభూషణ్ రతన్ టాటా పేరు పెట్టాలని నిర్ణయించింది. రావిర్యాల ఇంటర్‌చేంజ్‌కు ఇప్పటికే “టాటా ఇంటర్‌చేంజ్” అని పేరు పెట్టారు. అలాగే ప్రపంచంలోనే తొలిసారిగా హైదరాబాద్‌లోని అమెరికా కాన్సులేట్ జనరల్ ముందు నుంచే వెళ్లే ప్రధాన రహదారికి అమెరికా అధ్యక్షుడు డొనాల్డ్ ట్రంప్ పేరుతో “డొనాల్డ్ ట్రంప్ అవెన్యూ” అని నామకరణం చేయాలన్న ప్రతిపాదనను ప్రభుత్వం సిద్ధం చేసింది. ఈ నిర్ణయంపై కేంద్ర విదేశాంగ మంత్రిత్వ శాఖకు, అమెరికా రాయబార కార్యాలయానికి ప్రభుత్వం లేఖ రాయనుంది.

మరిన్ని ప్రధాన రహదారులకు గ్లోబల్ దిగ్గజ కంపెనీల పేర్లు

ఢిల్లీ లో ఇటీవల జరిగిన యూఎస్-ఇండియా స్ట్రాటజిక్ పార్టనర్ షిప్ ఫోరమ్ వార్షిక సదస్సులో ముఖ్యమంత్రి ఏ. రేవంత్ రెడ్డి చేసిన ప్రకటన ప్రకారం, హైదరాబాద్‌లోని ముఖ్య రహదారులకు ప్రముఖ అంతర్జాతీయ కంపెనీల పేర్లు పెట్టాలన్న దృష్టిలో భాగంగా మరిన్ని ప్రతిపాదనలు ఉన్నాయి: గ్లోబల్ టెక్ దిగ్గజం గూగుల్ సేవలను గుర్తిస్తూ ఒక ముఖ్య రహదారిని “గూగుల్ స్ట్రీట్” అని ప్రకటించేందుకు ప్రణాళిక సిద్ధం చేుకున్నారు. ప్రపంచ వ్యాప్తంగా ప్రభావిత వ్యక్తులు, ప్రముఖ కంపెనీల పేర్లను రహదారులకు పెట్టడం ద్వారా వారికి సముచిత గౌరవం ఇవ్వటంతో పాటు, హైదరాబాద్ కు అంతర్జాతీయ గుర్తింపు వస్తుందని సీఎం భావిస్తున్నారు. అలాగే ఆ రోడ్లపై ప్రయాణించివారికి కూడా స్ఫూర్తిమంతంగా ఉంటుందనే ఉద్దేశ్యంతో ముఖ్యమంత్రి ఈ ప్రతిపాదన చేశారని ప్రభుత్వ వర్గాలు చెబుతున్నాయి.

బీజేపీ , బీఆర్ఎస్ ఒప్పుకుంటాయా?

అయితే భారత రాష్ట్ర సమితి , బీజేపీ స్పందన ఎలా ఉంటుందన్నది ఆసక్తికరం. ఎందుకంటే గానగాంధర్వుడి విగ్రహాన్నే వద్దని ఉద్యమకారుల పేరుతో బీఆర్ఎస్ కార్యకర్తలు అంటున్నారు. ఇప్పుడు ట్రంప్ పేర్లు లాంటివి పెడితే ఊరుకుంటారా?. తెలంగాణ వైతాళికుల పేర్లు పెట్టాలని డిమాండ్ చేసే అవకాశం ఉంది. వారు మాత్రమే కాదని..తెలంగాణ కోసం సర్వం త్యాగం చేసిన వారు కూడా స్ఫూర్తినిస్తారని డిమాండ్ చేసే చాన్సులు ఉన్నాయి. బండి సంజయ్ ముందు హైదరాబాద్ పేరును భాగ్యనగరంగా మార్చాలని డిమాండ్ చేస్తున్నారు. ముందు ముందు ఈ పేరు రాజకీయం ఎంత మేర జరుగుతుందో వేచి చూడాల్సిందే.