సుకుమార్ …రాజశేఖర్… వీరిద్ద‌రికీ అస్స‌లు సంబంధ‌మే లేదు. క‌ల‌సి ఒక్క‌సారి కూడా ప‌నిచేయ‌లేదు. క‌నీసం ఒక్క వేదిక కూడా పంచుకోలేదు. అయినా. స‌రే… `నా జీవితాన్ని మార్చిన హీరో రాజశేఖర్` అని సుకుమార్ స‌గ‌ర్వంగా ప్ర‌క‌టించేశాడు. `శేఖర్` ప్రీ రిలీజ్ వేడుక‌లో. రాజశేఖర్ క‌థానాయ‌కుడిగా న‌టించిన చిత్రం శేఖర్. ఈనెల 20న వ‌స్తోంది. మంగ‌ళ‌వారం హైద‌రాబాద్‌లో శేఖర్ ప్రీ రిలీజ్ ఈవెంట్ జ‌రిగింది. ఈ కార్య‌క్ర‌మానికి సుకుమార్ ముఖ్య అతిథిగా పాల్గొన్నారు. ఈ సంద‌ర్భంగా త‌న జీవితాన్ని రాజశేఖర్ ఎలా మార్చారో వివ‌రంగా చెప్పుకొచ్చారు.
చిన్న‌ప్పుడు సుకుమార్ ఊర్లో.. ఓ స్నేహితుడు ఉండేవాడ‌ట. త‌ను అంద‌రి గొంతుల్నీ మిమిక్రీ చేస్తూ… సెంట్రాఫ్ అట్రాక్ష‌న్ గా ఉండేవాడ‌ట. త‌న‌ని చూసి సుకుమార్ ఎప్పుడూ జెల‌సీ ఫీల‌వుతూ ఉండేవాడ‌ట. ఓరోజు.. అంద‌రి ద‌ష్టిలో ప‌డేందుకు.. సుకుమార్ రాజశేఖర్ గొంతునీ, స్టైల్‌నీ ఇమిటేట్ చేసి చూపించాడ‌ట. దాంతో అందరూ సుకుమార్ ని మెచ్చుకొన్నార్ట. అలా.. అంద‌రి దృష్టిలో ప‌డ్డాన‌ని చెప్పుకొచ్చాడు సుకుమార్. తాను కూడా సినిమాల్లోకి రాగ‌ల‌న‌ని, సినిమాలకు ప‌నికొస్తాన‌న్న న‌మ్మ‌కం… ఆ రోజే వ‌చ్చింద‌ని, అందుకే స‌భాముఖంగా రాజ‌శేఖ‌ర్‌కు కృత‌జ్ఞ‌త‌లు చెప్పేశాడు సుకుమార్. ”నిజంగా నా జీవితాన్ని మార్చిన వ్య‌క్తి రాజశేఖర్. ఆరోజు ఆయ‌న్ని ఇమిటేట్ చేయ‌క‌పోతే. నాలో కాన్ఫిడెన్స్ వ‌చ్చేది కాదు. ఈ విష‌యం ఇప్ప‌టి వరకూ ఏ వేదిక‌పైనా పంచుకోలేదు. ఎప్పుడూ ఆ అవ‌కాశం రాలేదు. ఇప్పుడొచ్చింది కాబ‌ట్టి చెబుతున్నా” అంటూ త‌న బాల్య జ్ఞాప‌కాల్ని పంచుకున్నాడు సుకుమార్.
