ఏపీ రాజకీయాల్లో పాత గాయాలు, సంచలన హత్యల వెనుక ఉన్న మిస్టరీలు మళ్ళీ తెరపైకి వస్తున్నాయి. వైఎస్ రాజశేఖరరెడ్డి మరణంపై గతంలో బొత్స సత్యనారాయణ వ్యక్తం చేసిన అనుమానాలను అచ్చెన్నాయుడు గుర్తు చేయగా, బొత్స కన్నీరు పెట్టుకోవడం చర్చనీయాంశమైంది. అయితే, ఆ సమయంలో సానుభూతిని రాజకీయంగా మలుచుకోవడంలో జగన్ రెడ్డి చూపిన శ్రద్ధ, ఆ తర్వాత పరిణామాలను పరిశీలిస్తే.. తండ్రి మరణం అయినా, బాబాయ్ వివేకా హత్య అయినా అంతిమంగా లబ్ధి పొందింది జగన్ మాత్రమేనని అచ్చెన్నాయుడు చేసిన వ్యాఖ్యలకు రాజకీయ వర్గాల్లో మద్దతు లభిస్తోంది.
మరోవైపు, రాయలసీమ రాజకీయాలను కుదిపేసిన పరిటాల రవి హత్య కేసును టీడీపీ నేతలు ఇప్పుడు బలంగా తెరపైకి తెస్తున్నారు. ఈ కేసులో జగన్ మోహన్ రెడ్డి పేరు బయటకు రాకుండా అప్పట్లో కిరణ్ కుమార్ రెడ్డి 60 రోజుల పాటు తీవ్రంగా శ్రమించానని చెప్పడం మంత్రి పయ్యావుల కేశవ్ గుర్తు చేయడం కలకలం రేపుతోంది. అసలు ఆ 60 రోజులు కిరణ్ కుమార్ రెడ్డి ఏం కష్టపడ్డారో, ఎవరిని కాపాడేందుకు ఆ ప్రయత్నం చేశారో ఆయనే స్వయంగా బయటపెట్టాలని పయ్యావుల డిమాండ్ చేశారు. పరిటాల రవి హత్య కేసులో మొదటి నుంచి జగన్ పాత్రపై ఎన్నో అనుమానాలు ఉన్నాయని, ఇప్పుడు ఈ కేసును మళ్ళీ విచారిస్తే బాధ్యుల అసలు నైజం బయటపడుతుందని టీడీపీ నేతలు చెబుతున్నారు.
రాష్ట్ర రాజకీయాల్లో అత్యంత వివాదాస్పదమైన వైఎస్ కుటుంబసభ్యుల మరణాల వెనుక ఉన్న బెనిఫిషియరీ కోణాన్ని తవ్వితే జగన్ రెడ్డి రాజకీయ ప్రస్థానంలోని చీకటి కోణాలు వెలుగులోకి వస్తాయని విశ్లేషకులు భావిస్తున్నారు. అధికారం కోసం సొంత రక్తసంబంధీకుల మరణాలను కూడా రాజకీయం చేశారన్న ఆరోపణలు జగన్ను వెంటాడుతున్నాయి. ఇప్పుడు పాత కేసులను చర్చల్లోకి తీసుకురావడం ద్వారా ప్రజల్లో ఉన్న అనుమానాలను నిజం చేయాలని, తద్వారా బాధితులకు న్యాయం చేయాలని అధికార పక్షం వ్యూహాత్మకంగా అడుగులు వేస్తోంది.
