తనపై హత్యాప్రయత్నానికి సంబంధించిన దర్యాప్తులో ఎపి పోలీసులపై నమ్మకం లేదు గనక మూడవ పక్షంతో చేయించాలని వైసీపీ అద్యక్షుడు జగన్మోహనరెడ్డి హైకోర్టులో పిటిషన్‌ వేశారు. దానికి ముందు ఆ పార్టీ మాజీ ఎంపి వైవీ సుబ్బారెడ్డి కూడా ఇలాటి పిటిషనే వేసి వున్నారు. ఆ తర్వాత ఆయనతో సహా ఆ పార్టీ బృందం ఢిల్లీ వెళ్లి హొం మంత్రి రాజ్‌నాథ్‌ సింగ్‌ను కలిసి దర్యాప్తు చేయాలని కోరి వచ్చారు. కేంద్రం జోక్యం కోరడమేమిటి కావాలంటే కోర్టుల సహాయం కోరవచ్చునని నేను అదే రోజు సాక్షి చర్చలో అన్నాను. హైకోర్టులో కూడా పిటిషన్‌ వేశారని చర్చ నిర్వహిస్తున్న అమర్‌ చెప్పారు. అయితే తర్వాత తెలిసిందేమంటే అప్పటికి వేసిన పిటిషన్‌ సరికాదట. ఇలాటి దాడి ఘటనల్లో బాధితుడు తప్ప బయిటవారు వేస్తే చెల్లదట. వైవీ సుబ్బారెడ్డి పేరుతో వేసిన దాన్ని కోర్టు స్వీకరించే అవసరం లేదని తేలడంతో జగన్ స్వయంగా పిటిషన్‌ వేశారు. కేంద్రం జోక్యమే గాక న్యాయవ్యవస్థను కూడా ఆశ్రయించామని చెప్పడానికి కూడా ఇది ఉపయోగకరమని భావించి వుండొచ్చు. విమానాశ్రయంలో భద్రతా లోపం వల్లనే జగన్‌పై దాడి జరిగినట్టు,సిబిఐతో విచారణ జరిపించాలని కోరుతూ గుంటూరుకు చెందిన అనిల్‌ కుమార్‌ రెండు రోజుల కిందట ఒక ప్రజా ప్రయోజన వాజ్యం(పిల్‌) కూడా దాఖలు చేశారు. ఇప్పుడు హైకోర్టు ఈ రోజున జగన్ పిటిషన్‌ స్వీకరించింది గాని ఈ మూడింటిని కలిపి మంగళవారం విచారించాలని నిర్ణయించింది. మరి తుది ఆదేశాలు ఎలా వుంటాయో తెలియదు. దాడి ఘటన తీవ్రతపైన, పోలీసుల తీరుపైన, రాజకీయ పార్టీల ఆరోపణలపైన హైకోర్టు ఏదైన వ్యాఖ్యానించే అవకాశముంది. ముందే సందేహాలు ఎందుకని ఏదైనా జరిగితే అప్పుడే రావాలని కూడా చెప్పొచ్చు. అలాగాక కొన్ని కేసుల్లో వలె రాష్ట్ర పోలీసుల తీరును తప్పుపట్టొచ్చు కూడా. ఏవైనా ఆదేశాలతో మరోసారి విచారణ వాయిదా వేసినా ఆశ్చర్యం లేదు.
తెలకపల్లి రవి : వైవీ సుబ్బారెడ్డి పిటిషన్‌ పొరబాటు గనకనే…
