దుబ్బాక ఉపఎన్నికల్లో వెయ్యి ఓట్ల తేడాతో వచ్చిన గెలుపు.. గ్రేటర్ ఎన్నికల్లో యాభై కంటే తక్కువ డివిజన్లలో గెలుపు బీజేపీ నేతల్ని ఎక్కడికో తీసుకెళ్లిపోయాయి. ఇక తెలంగాణలో తమదే ఆధిపత్యం అని వారు కిందా మీదా పడి ప్రకటనలు చేస్తున్నారు. కానీ.. వరుస ఎన్నికల రాజకీయ పరమపద సోపానంలో.. ఇప్పుడు వారు ఎమ్మెల్సీ ఎన్నికల బారిన పడ్డారు. మళ్లీ అట్టడుగుకు చేరారు. ఎమ్మెల్సీ ఎన్నికల్లో పట్టభద్రులు కళ్లు మూసుకుని కమలం గుర్తుకు గుద్దేస్తాని.. పీవీ కుమార్తె కాదు కదా.. సీఎం కేసీఆర్ నిలబడినా గెలిచేస్తామని ఉర్రూతలూగిన బీజేపీ నేతలకు ఇప్పుడు ఫలితాలు మైండ్ బ్లాంక్ అయ్యేలా చేస్తున్నాయి. బీజేపీది బలుపు కాదు వాపు అని ఇతర పక్షాలు విమర్శించడానికి ఎమ్మెల్సీ ఎన్నికలు గొప్ప అవకాశంగా మారిపోయాయి.
నల్లగొండ, ఖమ్మం, వరంగల్ పట్ఠభద్రుల ఎమ్మెల్సీ ఎన్నికల్లో బీజేపీ అభ్యర్థి ప్రేమేందర్ రెడ్డి ఐదో స్థానంలో ఉన్నారు. అంటే ఆయనను ఓటర్లు అసలు పరిగణనలోకి తీసుకోలేదని అర్థం. ఇక్కడ ప్రేమేందర్ రెడ్డి అంటే బీజేపీనే. ఇంతకు ముందు ఎవరికీ పెద్దగా పరిచయం లేని నేత ఆయన. ఒక్క బీజేపీ అనే బ్రాండ్‌ను నమ్ముకునే రంగంలోకి దిగారు. కానీ అసలు రేసులోనే లేరు. ఇక హైదరాబాద్ స్థానంలో సిట్టింగ్ ఎమ్మెల్సీగా ఉన్న రామచంద్రరావు కూడా పరాజయం బాట పట్టారు. ఈ స్థానంలో కేసీఆర్ పోటీ చేసినా గెలుస్తానని ఆయన బీరాలు పోయారు. బీజేపీకి ఎలాంటి హవా లేనప్పుడే గెలిచానని ఇప్పుడు అంతా బీజేపీ మయమని ఎందుకు గెలవనని ఆయన ధీమా కావొచ్చు. కానీ అక్కడా టీఆర్ఎస్సే ఆధిక్యంలో ఉంది. చివరికి తానే గెలుస్తానని ఆయన మేకపోతు గాంభీర్యాన్ని ప్రదర్శిస్తున్నారు కానీ.. గ్యాప్ పెరిగిపోతూనే ఉంది. ఆయన అవకాశాలు సన్నగిల్లిపోతున్నాయి.
తెలంగాణ బీజేపీలో ఇప్పుడు సాగర్ సమరం ఎదురుగా ఉంది. గత ఎన్నికల్లో రెండు అంటే రెండు వేల ఓట్లు మాత్రమే తెచ్చుకున్నసాగర్‌లో ఇప్పుడు… కనీస ప్రభావం చూపించాల్సిన పరిస్థితి ఏర్పడింది. అది టీఆర్ఎస్ సిట్టింగ్ సీటు. జానారెడ్డి దశాబ్దాల పాటు గెలిచిన గడ్డ. బీజేపీకి అభ్యర్థి లేరు. నిన్నటి వరకూ ఆ పార్టీ తరపున పోటీకి కొంత మంది పోటీ పడ్డారు. కానీ ఇప్పుడు ఎమ్మెల్సీ ఎన్నికల తర్వాత.. ప్రజల్లో బీజేపీ పట్ల అంత మేనియా లేదని క్లారిటీ వచ్చిన తర్వాత చాలా మంది వెనుకడుగు వేసే అవకాశం ఉంది. భారతీయ జనతా పార్టీకి సాగర్ ఎన్నిక మరో పరీక్ష పెట్టబోతోంది. అక్కడ గెలవడం కాదు.. కనీస ప్రభావం చూపించాల్సి ఉంది. చూపించలేకపోతే.. ఆ పార్టీ మళ్లీ గతంలాంటి బీజేపీగా మారిపోతుంది. అప్పుడు… బండి సంజయ్ లాంటి బీజేపీ నేతలు చేసే ప్రకటనలు… కామెడీ అయిపోతాయి.
