ఇరాన్ పై దాడులతో అమెరికా ఏం సాధించిందో ఎవరికీ తెలియడంలేదు. చివరికి ట్రంప్ కు కూడా తెలియడం లేదు. కానీ అమెరికాభారీగా నష్టపోయింది. ఆ నష్టపోవడం అనేదిరెండు రకాలుగా ఉంది. సొంతంగా అమెరికా ఆర్థిక కష్టాల్లో కూరుకుపోవడం ఒకటి అయితే.. రెండోది తన శత్రువులు అయిన చైనా, రష్యాలను బలోపేతం చేయడం.

నెత్తి మీద చేయి పెట్టుకున్న ట్రంప్

ఇరాన్-అమెరికా మధ్య నెలకొన్న ఉద్రిక్తతలు మరియు డొనాల్డ్ ట్రంప్ అనుసరిస్తున్న దూకుడు వ్యూహాలు అంతర్జాతీయ రాజకీయ, ఆర్థిక సమీకరణాలను వేగంగా మారుస్తున్నాయి. ఈ దాడులు అమెరికాకు ఆశించిన ప్రయోజనం కంటే ఆర్థికంగా, వ్యూహాత్మకంగా ఎక్కువ నష్టాన్ని కలిగిస్తున్నాయి. ఇరాన్‌పై దాడులు , పశ్చిమాసియాలోపెరుగుతున్న ఉద్రిక్తతల వల్ల అమెరికా భారీగా సైనిక వ్యయాలను భరించాల్సి వస్తోంది. ఇప్పటికే భారీ లోటు బడ్జెట్, పెరుగుతున్న ద్రవ్యోల్బణంతో సతమతమవుతున్న అమెరికా ఆర్థిక వ్యవస్థకు, ఈ యుద్ధ వాతావరణం అదనపు భారంగా మారింది. చమురు ధరల అస్థిరత వల్ల అమెరికాలోని సామాన్య ప్రజలపై భారం పడటమే కాకుండా, డాలర్ విలువపై కూడా ప్రభావం పడుతోంది. ట్రంప్ తీసుకుంటున్న ఈ నిర్ణయాలు అమెరికాను ఆర్థికంగా కుప్పకూల్చే దిశగా తీసుకెళ్తున్నాయని ఆర్థికవేత్తలు హెచ్చరిస్తున్నారు.

రష్యా వ్యూహాత్మక విజయం

ఈ గందరగోళ పరిస్థితిని రష్యా తనకు అనుకూలంగా మార్చుకుంటోంది. అమెరికా ఇరాన్ పై దృష్టి సారించడంతో, రష్యాపై ఉన్న అంతర్జాతీయ ఆంక్షలను సడలించేలా ఒత్తిడి తెచ్చే ప్రయత్నాలు చేస్తోంది. ముఖ్యంగా ఇంధన అవసరాల రీత్యా, రష్యా నుండి ఆయిల్ కొనుగోలు చేయక తప్పని పరిస్థితిని రష్యా కల్పిస్తోంది. ఒక రకంగా చెప్పాలంటే, అమెరికా వేసిన ఆంక్షల ఉచ్చులో అమెరికానే చిక్కుకోగా, రష్యా మాత్రం తన చమురు విక్రయాల ద్వారా ఆర్థికంగా పుంజుకుంటోంది.

చైనాకు కలిసొస్తున్న చౌక చమురు

అమెరికా దాడుల వల్ల ఇరాన్ ఏకాకి కావడంతో, ఆ దేశం తన చమురును తక్కువ ధరకే విక్రయించాల్సి వస్తోంది. ఈ అవకాశాన్ని చైనా అందిపుచ్చుకుంటోంది. అంతర్జాతీయ మార్కెట్ ధర కంటే చాలా తక్కువకు ఇరాన్ నుండి చమురును దిగుమతి చేసుకుంటూ చైనా తన తయారీ రంగాన్ని మరింత బలోపేతం చేసుకుంటోంది. యుద్ధం జరుగుతున్నా సరే చైనాకు పెద్ద ఎత్తున ఇరాన్ ఆయిల్ పంపుతోందని రికార్డులు చెబుతున్నాయి. అమెరికా యుద్ధ తంత్రం వల్ల చైనా ఆర్థికంగా లాభపడుతూ, ప్రపంచ వేదికపై అమెరికాకు ధీటుగా ఎదుగుతోంది. ఇది అమెరికా శత్రువులను మరింత శక్తివంతులుగా మారుస్తోంది.

విఫలమవుతున్న ట్రంప్ వ్యూహాలు

డొనాల్డ్ ట్రంప్ తీసుకుంటున్న నిర్ణయాలు ఇరాన్ ను లొంగదీసుకోవడం పక్కన పెడితే, అమెరికా అంతర్జాతీయ ప్రతిష్టను దెబ్బతీస్తున్నాయి. అమెరికా మిత్రదేశాలు కూడా ఈ దూకుడు వైఖరి పట్ల అసంతృప్తిగా ఉన్నాయి. ఇరాన్ ను దెబ్బతీయాలని చూస్తూ, పరోక్షంగా చైనా, రష్యాల చేతుల్లోకి గ్లోబల్ పవర్ ను అప్పగిస్తున్నట్లు కనిపిస్తోంది. యుద్ధం వల్ల కలిగే నష్టం కేవలం ప్రాణ, ఆస్తి నష్టమే కాకుండా.. భవిష్యత్తులో అమెరికా ఆర్థిక ఆధిపత్యాన్ని దెబ్బతీసే ప్రమాదం ఉందని స్పష్టమవుతోంది.