యూవీ క్రియేష‌న్స్‌కి ఆస్థాన హీరోగా మారిపోయాడు సంతోష్ శోభన్. త‌ను ఇప్ప‌టి వ‌ర‌కూ చేసిన సినిమాల్లో స‌గం ఆ బ్యాన‌ర్ నుంచి వ‌చ్చిన‌వే. `ఏక్ మినీ క‌థ` ఓటీటీ వ‌ల్ల డ‌బ్బులు తెచ్చుకొంది. మిగిలిన‌వ‌న్నీ ఫ‌ట్ట్ మన్నాయి. అయితే.. యూవీని సంతోష్, సంతోష్‌ని యూవీ వ‌ద‌ల‌డం లేదు. తాజాగా సంతోష్ శోభన్ తో యూవీ మ‌రో సినిమా చేస్తోంది. విచిత్రం ఏమిటంటే… ఇది చిన్న సినిమా ఏం కాదు. దాదాపు రూ.25 కోట్లు పెట్టుబ‌డి పెడుతున్నారు. ఈ సినిమాతో సంతోష్‌ని యాక్ష‌న్ హీరోగా ప్ర‌జెంట్ చేయ‌బోతున్నార్ట. శ్రీ‌రామ్ రెడ్డి అనే దర్శకుడు ఈ సినిమాతో ప‌రిచ‌యం అవుతున్నాడు. శ్రీ‌రామ్ ఆదిత్య ద‌గ్గ‌ర శిష్య‌రికం చేశాడు శ్రీ‌రామ్ రెడ్డి. శ‌మంత‌క‌మ‌ణి, దేవ‌దాసు చిత్రాల‌కు ప‌ని చేశాడు.
ఇదో యాక్ష‌న్ సినిమా. గోపీచంద్ లాంటి హీరోల‌కు ఈ క‌థ చెప్పాడు శ్రీ‌రామ్ రెడ్డి. కానీ.. వాళ్లు లైట్ తీసుకొన్నారు.చివ‌రికి యూవీ ద‌గ్గ‌ర సెట్ అయ్యాడు. గోపీచంద్ లాంటి హీరోల‌కు సెట్ట‌య్యే క‌థ‌ని.. సంతోష్ ఎలా క్యారీ చేస్తాడ‌నుకొన్నారో ఏమో..? ఇది ఆర్మీ నేప‌థ్యంలో సాగే సినిమా అని తెలుస్తోంది. సంతోష్ శోభన్ సైనికుడిగా క‌నిపించే అవ‌కాశం ఉంది.
