సోలో సినిమాలు బాగా త‌గ్గించేశాడు వెంకీ. ఇప్పుడు చేస్తున్న‌వ‌న్నీ మ‌ల్టీస్టార‌ర్ సినిమాలే. అయితే `వెంకీ మామ`కి మాత్రం వెంకీ బాగా క‌నెక్ట్ అయిపోయాడు. త‌న మేన‌ల్లుడు నాగ‌చైత‌న్య‌తో తొలిసారి కలసి న‌టించ‌డం వ‌ల్లేమో… ఈ సినిమాని బాగా ఓన్ చేసుకున్నాడు. ఈ సినిమాకి సంబంధించి ఎప్పుడు మాట్లాడాల్సివ‌చ్చినా కాస్త ఎమోష‌న్ అయిపోతున్నాడు. వెంకీ మామ ప్రీ రిలీజ్ ఫంక్ష‌న్ ఖ‌మ్మంలో జ‌రిగింది. ఈ సంద‌ర్భంగా వెంకటేష్ ఎప్ప‌టిలా స‌ర‌దాగా స్పీచ్ మొద‌లెట్టి, మ‌ధ్య‌లో కాస్త ఎమోష‌న్ అయ్యి.. చివ‌ర్లో అల్ల‌రి చేసి, ప్రేక్ష‌కుల‌కు హుషారు పంచాడు.
ఈ సినిమాలో త‌ను చైతూకి మాత్ర‌మే వెంకీ మామ అని – సినిమా విడుద‌ల‌య్యాక తెలుగు ప్ర‌జ‌లంద‌రికీ నేను వెంకీ మామానే అని అన్నాడు వెంకీ. ఈ సినిమాలో చైతూ న‌ట‌న చింపేశాడ‌ని, ఓ మామ‌గా త‌న‌కు అంత‌కంటే ఏం కావాల‌ని, చైతూని చూస్తుంటే గ‌ర్వంగా ఉంద‌న్నాడు. బాబి ఈ సినిమాని బాగా హ్యాండిల్ చేశాడ‌ని, ప్ర‌తి ఒక్క‌రూ వంద శాతం క‌ష్ట‌ప‌డ్డార‌ని కితాబిచ్చాడు. సింగిల్ హ్యాండ్ గ‌ణేష్ అంటూ డైలాగులు చెప్పి అభిమానుల్ని ఉర్రూత‌లూగించాడు. వెంకీ ఆస‌నం వేసి అల‌రించాడు. ‘ఖ‌మ్మం.. ఆ సౌండ్ ఏద‌మ్మా..’ అంటూ ఉత్సాహ‌ప‌రిచాడు. మొత్తానికి వేదిక‌పై వెంకీ ఫుల్ ఎన‌ర్జీతో క‌నిపించాడు. విడుద‌ల‌కు ముందు ఇదో పాజిటీవ్ వైబ్రేష‌న్ అనుకోవాలి.
