తమిళనాడు రాజకీయాల్లో అగ్రనటుడు విజయ్ సరికొత్త వ్యూహంతో సమరశంఖం పూరించారు. దశాబ్దాలుగా ద్రవిడ గడ్డపై కొనసాగుతున్న రాజకీయ ధోరణిని మార్చే దిశగా ఆయన అడుగులు వేస్తున్నారు. తమిళనాడు ప్రజలు ఎప్పుడూ ఒక బలమైన ప్రజాకర్షక నేత వెంటే నడుస్తారనే చారిత్రక సత్యాన్ని విజయ్ తన ప్రచారానికి ప్రధాన అస్త్రంగా మార్చుకున్నారు. ఎంజీఆర్, కరుణానిధి, జయలలిత వంటి దిగ్గజాల తర్వాత ప్రస్తుతం ఆ స్థాయి ఆకర్షణ ఉన్న నేతగా తనను తాను ప్రతిక్షేపించుకోవడంలో విజయ్ సఫలమయ్యారు.
స్టాలిన్తోనే పోటీ అని ప్రచారం
ప్రస్తుత ఎన్నికల రణక్షేత్రంలో పోటీ కేవలం స్టాలిన్ కు, తనకు మధ్యేనని విజయ్ పదేపదే ప్రకటించడం వెనుక లోతైన రాజకీయ వ్యూహం దాగి ఉంది. రాష్ట్రంలో ప్రధాన ప్రతిపక్షంగా ఉన్న అన్నాడీఎంకేను రేసు నుండి తప్పించి, అసలైన పోరాటం టీవీకే వర్సెస్ డీఎంకే అన్నట్లుగా మార్చాలని ఆయన భావిస్తున్నారు. జయలలిత మరణానంతరం అన్నాడీఎంకేలో ఏర్పడిన నాయకత్వ లేమిని ఆయన తనకు అనుకూలంగా మార్చుకోవాలని చూస్తున్నారు. ఎడప్పాడి పళనిస్వామి వంటి నేతలు ఉన్నప్పటికీ, జయలలిత తరహాలో ప్రజలను ఉర్రూతలూగించే నాయకుడు ఆ పార్టీలో లేకపోవడం విజయ్కు కలిసొచ్చే అంశం.
అన్నాడీఎంకేను బలహీనపరిచే వ్యూహం
అన్నాడీఎంకే ఉనికిని బలహీనపరచడం ద్వారా ఆ పార్టీ ఓటు బ్యాంకును తనవైపు తిప్పుకోవాలని విజయ్ గట్టి ప్లాన్ వేశారు. డీఎంకేకు ప్రత్యామ్నాయం తామేనని ప్రజలకు నమ్మకం కలిగించగలిగితే, అన్నాడీఎంకే మద్దతుదారులు సహజంగానే టీవీకే వైపు మొగ్గు చూపుతారని ఆయన అంచనా. ఈ క్రమంలోనే స్టాలిన్ను నేరుగా లక్ష్యంగా చేసుకుంటూ ఘాటు విమర్శలు చేస్తున్నారు. అధికారాన్ని ఒకే కుటుంబం చేతుల్లో ఉంచడాన్ని నిరసిస్తూ, ప్రజాస్వామ్యబద్ధమైన మార్పు కోసం ప్రజలు తన వైపు రావాలని కోరుతున్నారు. ఈ వ్యూహం వర్కవుట్ అయితే, రాబోయే ఎన్నికల్లో టీవీకే అధికారంలోకి రాకపోయినప్పటికీ, అన్నాడీఎంకేను వెనక్కి నెట్టి రెండో స్థానానికి చేరుకోవడం ఖాయమని రాజకీయ విశ్లేషకులు భావిస్తున్నారు. ప్రధాన ప్రతిపక్ష హోదా దక్కితే, భవిష్యత్తులో డీఎంకేకు ఏకైక వారసుడిగా ఎదిగే అవకాశం ఉంటుంది. అందుకే అన్నాడీఎంకేను నిర్వీర్యం చేయడం ద్వారా తమిళనాడులో ద్విముఖ పోటీ వాతావరణాన్ని సృష్టించడమే విజయ్ ప్రస్తుత లక్ష్యం. ఈ క్రమంలో ఆయన చేస్తున్న ‘విజయ్ వర్సెస్ స్టాలిన్’ ప్రచారం సోషల్ మీడియాలో భారీగా ట్రెండ్ అవుతోంది.
అన్నాడీఎంకే ఎదురుదాడి చేసినా.. పట్టించుకోని విజయ్
నార్త్ చెన్నై వంటి కీలక నియోజకవర్గాల నుండి పోటీ చేయాలని నిర్ణయించుకోవడం ద్వారా విజయ్ తన పట్టును నిరూపించుకోవాలని చూస్తున్నారు. క్షేత్రస్థాయిలో ప్రజలతో మమేకమవుతూనే, మరోవైపు మేనిఫెస్టో కమిటీలు, ప్రచార కమిటీలతో పార్టీని పటిష్టం చేస్తున్నారు. స్టాలిన్ ప్రభుత్వంపై వస్తున్న అవినీతి ఆరోపణలు, పాలనాపరమైన వైఫల్యాలను ఎండగడుతూనే, తనను తాను ఒక స్వచ్ఛమైన శక్తి గా అభివర్ణించుకుంటున్నారు. ఈ క్రమంలో అన్నాడీఎంకే ఎదురుదాడి చేస్తున్నప్పటికీ, విజయ్ మాత్రం తన దృష్టిని కేవలం స్టాలిన్పైనే కేంద్రీకరించారు.
తమిళనాడు ఓటర్లు ఎప్పుడూ కొత్త ప్రయోగాలను ఆదరిస్తారనే నమ్మకంతో విజయ్ వేస్తున్న ఈ అడుగులు రాష్ట్ర రాజకీయ ముఖచిత్రాన్ని మార్చివేసేలా ఉన్నాయి. 2026 ఎన్నికలు కేవలం ఒక ప్రభుత్వాన్ని ఎన్నుకునేవి మాత్రమే కాకుండా, తమిళనాడు తదుపరి మహానేత ఎవరో నిర్ణయించేవి కూడా కాబోతున్నాయి. ఈ చదరంగంలో విజయ్ వేస్తున్న ఎత్తుగడలు అన్నాడీఎంకేను చిక్కుల్లో పడేయగా, డీఎంకేను సైతం ఆత్మరక్షణలో పడేస్తున్నాయి.
