విరాట‌ప‌ర్వం… ఈ సినిమా పూర్త‌యి చాలా కాలం అయ్యింది. మ‌ధ్య‌లో ఓటీటీనా – ధియేట‌రా? అంటూ ఊగిస‌లాడింది. ఎట్ట‌కేల‌కు ఈ సినిమాని థియేట‌ర్ల‌లోనే విడుద‌ల చేయాలని నిర్మాత‌లు నిర్ణ‌యించుకున్నారు. ఈనెల 17న విరాట‌ప‌ర్వం విడుద‌ల అవుతోంది.
విరాట‌ప‌ర్వం సినిమాపై చాలా గాసిప్పులు వ‌చ్చాయి. ఈ సినిమాలో సాయి ప‌ల్ల‌వి పాత్రే హైలెట్ అయ్యింద‌ని, ఈ సినిమా క‌థంతా ఆమె చుట్టూనే తిరుగుతుంద‌ని, రానా కేవ‌లం.. స‌పోర్టింగ్ రోల్ కి మాత్ర‌మే ప‌రిమితం అయ్యాడ‌ని… ఇలా ర‌క‌ర‌కాల వార్త‌లు. సాయి ప‌ల్ల‌వి ఎక్క‌డ హైలెట్ అయిపోతుందో అని రానా కంగారు ప‌డుతున్నాడ‌ని, అందులో రీషూట్లు చేశార‌ని, సినిమాకి క‌త్తెర్లు ప‌డ్డాయ‌ని ర‌క‌ర‌కాల క‌బుర్లు.
ఈ వార్త‌ల‌న్నీ సురేష్ ప్రొడ‌క్ష‌న్స్ వ‌ర‌కూ చేరాయేమో..? వాళ్లు కొత్త త‌ర‌హా ప్ర‌చారం మొద‌టెట్టారు. `ఈ సినిమా సాయి ప‌ల్ల‌వి కోస‌మే తీశాం..` అని ముందే చెప్పేసి, జ‌నాల్ని ప్రిపేర్ చేయ‌డం మొద‌లెట్టారు. రేపు (ఆదివారం) క‌ర్నూలులో ట్రైల‌ర్ రిలీజ్ వేడుక జ‌ర‌గ‌బోతోంది. ఈ సంర్భంగా చిత్ర‌బృందం ఓ ప్ర‌మోష‌న‌ల్ వీడియో విడుద‌ల చేసింది. ఓ యూట్యూబ‌ర్‌… రానాని వెదుక్కుంటూ సురేష్ ప్రొడ‌క్ష‌న్స్ కివెళ్లాడు. తాను సాయి ప‌ల్ల‌వి ఫ్యాన్ అని ప‌రిచ‌యం చేసుకుని, `మా సాయి ప‌ల్ల‌వి ఎప్పుడొస్తుంది? ట్రైల‌ర్ ఎప్పుడు` అని ప్ర‌శ్న‌లు సంధిస్తాడు. అందుకు రానా `నేను కూడా సాయి ప‌ల్ల‌వి ఫ్యానే.. ఈ సినిమాని సాయి ప‌ల్ల‌వి కోస‌మే తీశాం రా బాబూ` అని చెప్పి.. ఆ అభిమానిని శాంతింప చేస్తాడు. అంటే.. ఇది అచ్చంగా సాయి ప‌ల్ల‌వి సినిమానే అని చిత్ర‌బృందం ఒప్పేసుకున్న‌ట్టే క‌దా? ఈ విష‌యంలో రానా కూడా ఈగోల‌కు పోకుండా `నేను సాయి ప‌ల్ల‌వి ఫ్యాన్. త‌న కోస‌మే ఈ సినిమా తీశాం` అని చెప్పుకోవ‌డం ఆక‌ట్టుకుంటోంది. సో.. రానానే స్వ‌యంగా ఒప్పుకొన్నాడు కాబ‌ట్టి… గాసిప్పుల‌కు పుల్ స్టాప్ పెట్టేయొచ్చు.
