ద‌స‌రా సంద‌ర్భంగా టాలీవుడ్ కొత్త సినిమాలతో క‌ళ‌క‌ళ‌లాడింది. మ‌హాస‌ముద్రం ఫ్లాప్ అయ్యింది. మోస్ట్ ఎలిజిబుల్ బ్యాచిల‌ర్ ఓకే అనిపించుకుంది. పెళ్లి సంద‌డి బోర్ కొట్టించినా, కొన్ని ఏరియాల్లో అనూహ్య‌మైన వ‌సూళ్ల‌ని రాబ‌ట్టుకుంది. ఈ వారం కూడా మూడు సినిమాలొస్తున్నాయి. అయితే… వాటిలో క్రేజ్ ఉన్న సినిమా ఏదీ లేదు.పైగా తెలిసిన న‌టీన‌టుల సినిమాలూ లేవు. ఏదైనా అద్భుతం జ‌రిగి, ఊహించ‌ని రిజ‌ల్ట్ వస్తే త‌ప్ప… ఈవారం బాక్సాఫీసు ద‌గ్గ‌ర కాసుల గ‌ళ‌గ‌ళ వినిపించ‌దు.
ఈవారం వ‌స్తున్న సినిమాల్లో కాస్తో కూస్తో ఫోక‌స్ ‘నాట్యం’ సినిమాపైనే ఉంటుంది. ప్రముఖ కూచిపూడి నృత్యకారిణి సంధ్యారాజు నటిగా పరిచయమవుతున్న చిత్ర‌మిది. రేవంత్ కోరుకొండ దర్శకత్వం వ‌హించారు. ఈసినిమాకి ప్ర‌మోష‌న్లు కాస్త గ‌ట్టిగానే చేస్తున్నారు. ట్రైల‌ర్‌ని రామ్ చ‌ర‌ణ్ ఆవిష్క‌రిస్తే, ఈసినిమా గురించి చిరంజీవి కూడా మెచ్చుకుంటూ కామెంట్లు చేశారు. అలా.. మెగా ప్ర‌మోష‌న్లు ఈ సినిమాకి ప్ల‌స్ కావొచ్చు. ఇదే రోజున ‘అస‌లేం జ‌రిగింది’, ‘మ‌ధుర వైన్స్‌’ సినిమాలొస్తున్నాయి. ఓటీటీలోనూ ఒక‌ట్రెండు సినిమాలు రిలీజ్ కి రెడీ అవుతున్నాయి. కాక‌పోతే.. ఆ సంద‌డే క‌నిపించ‌డం లేదు. వ‌చ్చేవారం ‘రొమాంటిక్‌’, ‘వ‌రుడు కావ‌లెను’ ప్రేక్ష‌కుల ముందుకు వ‌స్తున్నాయి. బాక్సాఫీసు ద‌గ్గ‌ర కాస‌త్ జోష్ చూడాలంటే అప్ప‌టి వ‌ర‌కూ ఆగాలేమో..?
