రాక్షసిలాంటి పిన్ని చేతిలో చిత్రహింసలు అనుభవించి నరకాన్ని చూసిన ప్రత్యూష విషయంలో తెలంగాణ ముఖ్యమంత్రి స్పందించిన తీరును ప్రజలంతా పొగుడుతున్నారు. ఆమెను ఇంటికి తీసుకెళ్లి భోజనం పెట్టారు. చదువు చెప్పించడానికి ఏర్పాట్లు చేశారు. పెళ్లి చేస్తానని మాటిచ్చారు. మానవత్వం పరిమళించిన సందర్భమని మీడియా కూడా వేనోళ్ల పొగిడింది.
ప్రత్యూష విషయంలో ఇంత ఔదార్యం ప్రదర్శించిన కేసీఆర్, పిచ్చుకమీద బ్రహ్మాస్త్రం ఎందుకు ప్రయోగిస్తున్నారనేది మాత్రం అంతుచిక్కని విషయం. జీతాలు పెంచాలంటూ రాష్ట్ర వ్యాప్తంగా మున్సిపల్ కార్మికులు మొన్నటి వరకూ సమ్మె చేశారు. పారిశుధ్య పనులు నిలిపివేశారు. ప్రతిపక్షంలో ఉన్నప్పుడు వివిధ రంగాల కార్మికుల, ఉద్యోగుల సమ్మెలకు కేసీఆర్ మద్దతు ప్రకటించారు. వారి తరఫున పోరాడానికి కూడా సిద్ధపడ్డారు. వేతనాలు పెంచాలని డిమాండ్ చేశారు. తాను ముఖ్యమంత్రి అయిన తర్వాత ఆర్టీసీ కార్మికులు సమ్మెచేసి బస్సులను ఆపేసినా, వారు అడిగిందానికంటే ఎక్కువే ప్రకటించారు.
మున్సిపల్ కార్మికులు వెంటనే సమ్మె విరమించాలని కేసీఆర్ ప్రభుత్వం హుకుం జారీ చేసినా చాలా మంది విరమించలేదు. ఇది కేసీఆర్ కు కోపం తెప్పించింది. తాను ప్రకటించే నాటికి సమ్మె విరమించిన వారికి భారీగా వేతనాలు పెంచారు. విరమించని పారిశుధ్య కార్మికులను విధుల్లోంచి తొలగించాలని ఆదేశించారు. వీధుల్లో పారిశుధ్య కార్మికులపై వేటు వేయడమంటే పిచ్చుకపై బ్రహ్మాస్త్రం వేయడం వంటిదే. నామమాత్రపు వేదనాలతో రోడ్లను శుభ్రం చేసే వారిలో ఎక్కువ మంది మహిళలే. అందులోనూ ఎస్సీ, ఎస్టీ, బీసీ బడుగు బలహీన వర్గాల వారే అధికం.
ఉన్న పని ఊడిపోవడంతో వారు ఆందోళనలో ఉన్నారు. దిక్కుతోచని స్థితిలో ఓ మహిళ ఆత్మహత్యా ప్రయత్నం చేసింది. వేల మంది పారిశుధ్య కార్మికులు ఉపాధిలేక రోడ్డుమీద పడటం భావ్యమా? ప్రత్యూష విషయంలో ఎంతో ఔదార్యం చూపిన వ్యక్తి, కొన్ని వేల మంది బడుగు బలహీన వర్గాల పేద మహిళల పట్ల ఇంత కఠినంగా ఎలా ఉండగలరు? ఇదే అర్థం కాని విషయం. తాను చెప్పినప్పుడు సమ్మె విరమించలేదనే కోపం అయి ఉంటుంది. జీతాలు పెంచాలని డిమాండ్ చేసే కార్మికులు పట్టుదలగా సమ్మె చేయడం మహా పాపమేమీ కాదు. వారి ఆవేదనను అర్థం చేసుకోకుండా, నేను చెప్పిందే వేదం అనే తరహాలో వేల మందికి ఉపాధి లేకుండా చేయడమే ఆశ్చర్యకరం. ఇప్పటికైనా కేసీఆర్ వాస్తవ పరిస్థితిని అర్థం చేసుకోవాని పేద పారిశుధ్య కార్మికులు కోరుతున్నారు.
