నాగార్జున అంటే.. రొమాంటిక్ పాత్ర‌లు, మ‌న్మ‌థుడు లాంటి ఇమేజ్ గుర్తొస్తుంది. ఆయ‌న యాక్షన్ బ‌రిలోకి దిగి.. చాలాకాలం అయ్యింది. ఇన్నాళ్ల‌కు నాగ్ మ‌ళ్లీ యాక్షన్ మోడ్‌లోకి వ‌చ్చాడు. `వైల్డ్ డాగ్` సినిమాతో. సాల్మ‌న్ దర్శకుడు. ఏప్రిల్ 2న విడుద‌ల అవుతోంది. ఇప్పుడు ట్రైలర్ బ‌య‌ట‌కు వ‌చ్చింది.
హైద‌రాబాద్‌లో జ‌రిగిన వ‌రుస బాంబు పేలుడు ఘ‌‌ట‌న గుర్తుండే ఉంటుంది. ఇప్పుడు ఈ క‌థా నేప‌థ్యం కూడా అదే. హైద‌రాబాద్ లో జ‌రిగిన పేలుళ్ల‌కు కార‌ణ‌మైన పాకిస్థానీ టెర్ర‌రిస్టుల్ని ప‌ట్టుకోవ‌డ‌మే.. వైల్డ్ డాగ్ ప్రయత్నం. విజ‌య్ వ‌ర్మ అనే క‌మెండో.. తాను చేసే ఆప‌రేష‌న్‌… ఇదే క‌థ. 2 నిమిషాల 24 సెక‌న్ల పాటు సాగే ఈ ట్రైలర్ లో మొత్తం యాక్షన్ క‌ట్సే. బుల్లెట్ చ‌ప్పుళ్లూ, ప‌రుగులే.
విజ‌య్ వ‌ర్మ‌గా నాగార్జున న‌టించారు. త‌న గ్యాంగ్ ముద్దు పేరు వైల్డ్ డాగ్. ఎవ‌రైనా టెర్ర‌రిస్టు దొరికితే.. అరెస్ట్ చేసుకోవ‌డం ఏమీ ఉండ‌దు. డైరెక్ట్ గా పైలోకాల‌కు పంప‌డ‌మే. మేకింగ్‌లో క్వాలిటీ క‌నిపించింది. నాగ్.. ఆధ్యంతం సీరియ‌స్ లుక్‌లోనే క‌నిపించారు. టెర్ర‌రిస్టు వేట.. థ్రిల్లింగ్ గానే సాగి ఉంటుంద‌ని ట్రైల‌ర్‌లో అర్థం అవుతోంది. దేశ‌భ‌క్తికి సంబంధించిన డైలాగులూ.. ట్రైల‌ర్‌లో వినిపించాయి. మొత్తానికి.. ఇదో మంచి యాక్షన్ మూవీ అయ్యే అవ‌కాశం వుంది.
