ప్రస్తుతం తెలంగాణాలో కాంగ్రెస్, తెరాసల మధ్య ఇందిరమ్మ ఇళ్ళు అంశంపై జరుగుతున్న మాటల యుద్ధంలో చాలా ఆసక్తికరమయిన విషయాలు వెలుగులోకి వస్తున్నాయి. “తెరాస అధికారంలోకి వచ్చిన తరువాత పేద ప్రజలను ఆదుకొంటుందని అందరూ ఆశిస్తే తమ హయాంలో పేదలకు మంజూరు చేసిన ఇందిరమ్మ ఇళ్ళ తాలూకు బిల్లులు నేటికీ చెల్లించకుండా తెరాస ప్రభుత్వం త్రొక్కి పట్టి ఉంచిందని పీసీసీ అధ్యక్షుడు ఉత్తమ కుమార్ రెడ్డి ఆరోపించారు. తెరాస ప్రభుత్వం వాటిని మంజూరు చేస్తే కాంగ్రెస్ పార్టీకే మంచిపేరు, ప్రజలలో ఆదరణ పెరుగుతుందనే భయంతోనే ఏడాది గడిచినా ఇంకా బిల్లులు చెల్లించకుండా పేద ప్రజలని ఇబ్బంది పెడుతోందని ఆయన ఆరోపించారు.
ఒక ప్రభుత్వం మంజూరు చేసిన పధకాలను మరొక ప్రభుత్వం కొనసాగించినప్పుడే ప్రజలకు ప్రభుత్వాల మీద విశ్వాసం నిలుస్తుంది. కానీ ప్రభుత్వాలు మారగానే పేదల చేతిలో ఉన్నదానిని కూడా వారికి దక్కకుండా చేస్తే ప్రభుత్వాల మీద ప్రజలు నమ్మకం కోల్పోతారు. ప్రస్తుతం ఇందిరమ్మ ఇళ్ళ విషయంలో కూడా అదే జరుగుతోందని స్పష్టమవుతోంది.
కానీ ఉత్తమ కుమార్ రెడ్డి చేసిన ఆరోపణలకు ఆర్మూరు తెరాస ఎమ్మెల్యే ఏ. జీవన్ రెడ్డి చాలా ఘాటయిన సమాధానం ఇచ్చారు. కాంగ్రెస్ హయంలో ఇందిరమ్మ ఇళ్ళ పేరిట కాంగ్రెస్ నేతలే అనేక అక్రమాలకూ పాల్పడ్డారని, అనేక చోట్ల అసలు ఇళ్ళ నిర్మాణం చేయకుండానే ఇళ్ళు కట్టినట్లు కాగితాల మీద చూపించి సొమ్ము దిగమింగారని, కొన్ని చోట్ల గ్రామాలలో ఉన్న జనాభా కంటే అధికంగా ఇళ్ళు కట్టినట్లు చూపించి ప్రభుత్వం ధనం బొక్కేసారని, ఆ ఆక్రమాలపై విచారణ పూర్తయితే కాంగ్రెస్ నేతల్లో సగం మంది జైలుకి వెళ్ళవలసి వస్తుందని ఆయన అన్నారు. అంటే కాంగ్రెస్ నేతలు పేదల పేరు చెప్పుకొని అక్రమాలకు పాల్పడటం కూడా నిజమేనని స్పష్టం అవుతోంది.
విచారణ పూర్తయితే కాంగ్రెస్ లో సగం మంది జైలుకే పోతారుట!
