హైదరాబాద్: వైఎస్ జగన్మోహన్ రెడ్డి వైఎస్ఆర్ కాంగ్రెస్ పార్టీని స్థాపించిననాటినుంచి తెలుగుదేశం నేతలు ఆ పార్టీకి ‘పిల్లకాంగ్రెస్’ అని నిక్ నేమ్ పెట్టి ఎద్దేవా చేస్తుండటం తెలిసిందే. అంటే వాళ్ళర్థం కాంగ్రెస్ పార్టీనుంచి పుట్టిన పార్టీ అని. అయితే ఇప్పుడు ట్రెండ్ మారింది. వైసీపీ నేతలు కాంగ్రెస్ను పిల్ల టీడీపీ అని సంబోధించటం మొదలు పెట్టారు. వైసీపీ అధికార ప్రతినిధి వాసిరెడ్డి పద్మ ఇవాళ హైదరాబాద్లో మీడియాతో మాట్లాడుతూ, కాంగ్రెస్ బతుకంతా పిల్ల టీడీపీలా బతకటమేనని అన్నారు. కాంగ్రెస్ ఉపాధ్యక్షుడు రాహుల్ గాంధి ఆంధ్రప్రదేశ్ పర్యటనపై స్పందిస్తూ ఆమె ఈ వ్యాఖ్యలు చేశారు. కాంగ్రెస్ పార్టీ రాష్ట్రాన్ని అడ్డగోలుగా విభజించటంవల్లే రైతు ఆత్మహత్యలు పెరిగాయని, ఇప్పుడు ఏ ముఖం పెట్టుకుని రాహుల్ ఏపీలో పర్యటిస్తారని ప్రశ్నించారు. దివంగత వైఎస్సార్ పేరును ఛార్జిషీట్లో చేర్చిన విషయాన్ని మర్చిపోయారా అని అడిగారు. కాంగ్రెస్ తమ ఓటుబ్యాంకును టీడీపీకి మళ్ళించిందని ఆరోపించారు.
కాంగ్రెస్ను ‘పిల్ల టీడీపీ’ అంటున్న పిల్ల కాంగ్రెస్
