హిట్టూ, యావ‌రేజ్ మ‌ధ్య ఊగిస‌లాడిన సినిమా పుష్ప. డివైడ్ టాక్ వ‌చ్చినా, వ‌సూళ్ల హ‌వా త‌గ్గ‌లేదు. ముఖ్యంగా బీ,సీల‌లో పుష్ప‌కి మంచి వ‌సూళ్లు ద‌క్కాయి. ఇప్పుడు పుష్ప 2 వంతు. పుష్ప 2 ఉంటుందా, లేదా? అనే సందిగ్థానికి తెర ప‌డింది. ఫిబ్ర‌వ‌రి నుంచి పుష్ప 2 షూటింగ్ ప్రారంభం కానుంది. స్క్రిప్టు సిద్ధంగా ఉండ‌డంతో.. సుకుమార్ ఈసారి పెద్ద‌గా స‌మ‌యం తీసుకోవాల్సిన అవ‌స‌రం లేదు. కాక‌పోతే… బ‌న్నీ సుక్కుకి డెడ్ లైన్ విధించేశాడు. వంద రోజుల్లో షూటింగ్ పూర్తి చేయాల‌ని టార్గెట్ ఫిక్స్ చేశాడు. 2022 ద‌స‌రాకి.. పుష్ప 2 రావాలి. ఇదీ… సుకుమార్ ల‌క్ష్యం.
పుష్ప 2 కి సంబంధించి రెండంటే రెండే సీన్లు తెర‌కెక్కించారు. అంటే దాదాపుగా సినిమా మొత్తం తీయాలి. బ‌న్నీ కాల్షీట్లు రెడీగానే ఉన్నాయి. మిగిలిన వాళ్ల కాల్షీట్లు దొర‌కాలి. ఫ‌హ‌ద్ ఫాజిల్ కి సంబంధించి ఎక్కువ డేట్లు అవ‌స‌రం. త‌నుమ‌ల‌యాళంలో బిజీ స్టార్‌. త‌న కాల్షీట్ల వెసులుబాటుని బ‌ట్టి.. పుష్ప షూటింగ్ వేగం ఆధాప‌డి ఉంటుంది. పుష్ప 2 స్క్రిప్టు రెడీగా ఉన్నా, కొన్ని మార్పులు చేర్పులూ అవ‌స‌రం అవుతున్నాయ‌ని స‌మాచారం. ముఖ్యంగా బ‌న్నీ – ర‌ష్మిక‌ల మ‌ధ్య ట్రాక్ కి పుష్ప 2 లో అవ‌కాశం లేకుండా పోయింద‌ని, దాన్ని మ‌ళ్లీ రాయ‌ల్సివ‌స్తోంద‌ని స‌మాచారం. పుష్ప 2లో మ‌ద‌ర్ సెంటిమెంట్ మ‌రింత బాగా ద‌ట్టించార్ట. ఆ డోసు త‌గ్గించే అవ‌కాశం ఉంది. కొన్ని `రా` సీన్ల‌ను.. సెటిల్డ్ గా రాసుకోవాలని, దానికి సుకుమార్ కి కొంత స‌మ‌యం ప‌ట్ట‌బోతోంద‌ని టాక్. బ‌న్నీ ఫిబ్ర‌వ‌రి వ‌ర‌కూ షూటింగ్ కి రాన‌ని చెప్పేశాడ‌ట. సో.. అప్ప‌టి వ‌ర‌కూ స్క్రిప్టులో రిపేర్లు చేసుకునే వీలుంది.
