నిజమే.నిన్న మొన్న ప్రపంచ తెలుగు మహాసభలు అంత ఘనంగా నిర్వహించిన ముఖ్యమంత్రి కెసిఆర్‌ ఇలా అంటారా అంటే అన్నారు మరి. ఇండియా టుడే దక్షిణాది కాంక్లేవ్‌లో రాజ్‌దీప్‌ సర్దేశాయి ప్రశ్నకు జవాబుగా ఆయన అన్న మాటలివి.తెలంగాణ ఆంధ్ర పూర్తిగా భిన్నమైనవనీ, మాట్లాడే భాష, ఆచారాలు పండుగలు అన్నీవేర్వేరని చెప్పారు. మాట్లాడే భాష అన్నదాన్ని తర్వాత యాసగా సర్దుకున్నారు. ఎన్టీఆర్ పార్టీలోనుంచి వచ్చిన మీరు అలా అంటున్నారా అంటే మరోసారి ఔనని సమాధానమిచ్చారు. ఈ కాంక్లేవ్‌లో రాజ్‌దీప్‌ అడిగిన ప్రశ్నలు ఏమంత బాగాలేకపోవడంతో కెసిఆర్‌ అవలీలగా జవాబులు చెప్పేశారు. జూన్‌2న రాష్ట్రావతరణ తర్వాత ఇది నిలబడుతుందా లేదా అని మీరెప్పుడైనా నెర్వస్‌ అయ్యారా అని రాజ్‌దీప్‌ అడిగిన ప్రశ్నకు వచ్చే జవాబు ముందే వూహించదగింది. అసలు ఆంధ్ర ప్రదేశ్‌ ఏర్పాటే తప్పని కెసిఆర్‌ జవాబు. అంతటితో ఆగక ఆనాడు తెలంగాణలో ప్రజలు పార్టీలూ అందరూ వ్యతిరేకించినా దాన్ని ఏర్పాటు చేశారని కెసిఆర్‌ చెప్పింది మాత్రం ఒక చారిత్రిక అవాస్తవం. తెలంగాణ దేశంలో నెంబర్‌ 1గా వున్నప్పుడు వాస్తు బాగాలేదని సచివాలయం మార్చడం ఎందుకుని రాజ్‌దీప్‌ ఒక మంచి ప్రశ్న వేస్తే ఇప్పుడున్నది ఏమాత్రం బాగాలేదని బదులిచ్చారు. ప్రగతిభవన్‌ తన ఇల్లు కాదని అధికార నివాసమని మరో మాట చెప్పారు. కుటుంబ సభ్యులందరికీ పదవులు ఇవ్వడంతో మిగిలిన ప్రాంతీయ పార్టీలలాగే టిఆర్‌ఎస్‌ కూడా కుటుంబ పాలనగా మారిందని అడిగితే చాలా తెలివిగా నా కుటుంబమే తెలంగాణ అన్నారు. తర్వాత తెలంగాణే నా కుటుంబం అని జోడించారు. జాతీయ రాజకీయాలపై ఆసక్తి లేదన్నారు.మొత్తంపైన ఈ ప్రశ్నల తతంగం రొటీన్‌గానే చెప్పాల్సి వుంటుంది. కెసిఆర్‌ కేంద్ర మంత్రిగా వున్నప్పటికంటే ఇప్పుడు ఎక్కువ ఆత్మ విశ్వాసంతో కనిపిస్తున్నారని అంటే విజయాలు ప్రజల మద్దతు వున్నప్పుడు అంతేనని ఆయన బదులిచ్చారు.
తెలుగు ఐడెంటిటీనే లేదన్న కెసిఆర్‌
