లేటెస్టుగా ప్రేక్షకుల ముందుకొచ్చిన ‘నేల టికెట్టు’లో బ్రహ్మానందం నటించారు. థియేటర్ బయటకు వచ్చిన ప్రేక్షకుడికి గుర్తు చేస్తే తప్ప సినిమాలో బ్రహ్మీ నటించాడనే సంగతి గుర్తు లేదంటే అది ప్రేక్షకుడి తప్పు కాదు. ఎందుకంటే… సినిమాలో ఆయన పాత్ర అంత గొప్పగా వుంటుంది మరి. ఎంత గొప్ప అంటే… సుమారు 2.45 గంటల సినిమాలో ఆయనకు రెండంటే రెండు డైలాగులు మాత్రమే వున్నాయి. అవీ 30 ఇయర్స్ పృథ్వీతో హీరో మందు సిట్టింగ్‌లో కూర్చున్నప్పుడు. అందులో ఓ డైలాగ్ అయితే ‘అవునా?’ అని! ఆయన కంటే జూనియర్స్ అయిన పృథ్వీ, ప్రవీణ్, పోసాని, రఘుబాబులకు కాస్తో కూస్తో చెప్పుకోదగ్గ డైలాగులు ఉంటే… ఈయనకు కొన్ని సన్నివేశాల్లో బేల చూపులు మాత్రమే మిగిలాయి. మరింత దారుణమైన విషయం ఏంటంటే… చాలా సన్నివేశాల్లో కృష్ణానగర్ జూనియర్ ఆర్టిస్ట్ టైపులో గుంపులో గోవిందగా నిలబెట్టారు. అటువంటి పాత్రకు బ్రహ్మానందాన్ని తీసుకోవడం ఎందుకో మరి? బ్రహ్మానందం వంటి స్టార్ కమెడియన్ చేత సినిమాలో అత్యంత ప్రాధాన్యత లేని పాత్ర చేయించడం ఏంటోనని విమర్శకులతో పాటు ప్రేక్షకుడు కూడా జుట్టు పీక్కునే పరిస్థితి.
బ్రహ్మానందం కామెడీ రొటీన్ అవుతుందనే విమర్శ వున్నప్పటికీ… స్క్రీన్ మీద ఆయన కనిపించే సరికి రొటీన్‌గా నవ్వేసే ప్రేక్షకులు, మాస్ జనాలు ఇంకా వున్నారు. పరమ రొటీన్ సన్నివేశాలను బ్రహ్మానందం తన నటనతో కొంచెం గట్టు ఎక్కించిన సందర్భాలు, ‘నేల టిక్కెట్టు’ వంటి రొటీన్ సినిమాలో ఎంతోకొంత నవ్వులు పూయించిన సన్నివేశాలు కోకొల్లలు. అటువంటి ఆణిముత్యాన్ని దర్శకుడు కళ్యాణ్ కృష్ణ సరిగా వాడుకోలేదు అనడం సబబుగానే వుంటుందేమో. బ్రహ్మానందాన్ని అంతలా తీసిపారేశారేంటో? ఒకవేళ ఆయనపై సన్నివేశాలు చిత్రీకరించి, ఎడిటింగులో తీసేశారని అనుకోవడానికి మిగతా సన్నివేశాలు ఏమంత గొప్పగా వున్నాయని! బహుశా… ‘సీతమ్మ వాకిట్లో సిరిమల్లె చెట్టు’లో బ్రహ్మీపై కొన్ని సీన్లు తీసి, ఎడిటింగులో లేపేశారు. ఆ తరవాత ఓ పెద్ద హీరోలో ఇంత నాశిరకం పాత్ర బ్రహ్మానందంకి లభించడం ఇదేనేమో!!
