ప్రత్యేకహోదా అంశాన్ని రాజకీయంగా… వాడుకోవడానికి కాంగ్రెస్ పార్టీ కూడా.. ప్రయత్నాలు చేస్తోంది. ప్రత్యేకహోదా అంశానికి కాంగ్రెస్ పార్టీ చాలా రోజులు క్రితమే బేషరతుగా మద్దతు ప్రకటించింది. ప్రకటించకపోవడానికి కూడా అవకాశమే లేదు. ఎందుంటే.. విభజనతో కట్టుబట్టలతో మిగిలిపోయే ఆంధ్రప్రదేశ్‌కి అంతో ఇంతో అండగా ఉండటానికి కాంగ్రెస్ పార్టీనే ప్రత్యేకహోదాను ప్రకటించింది. ఇప్పుడు తాము ఇవ్వలేము అంటే… ఒక్క ఆంధ్రప్రదేశ్ ప్రజలే కాదు.. దేశం మొత్తం అసహ్యించుకునే ప్రమాదం ఉంది. అధికారంలోకి వస్తే తొలి సంతకం ప్రత్యేకహోదా ఫైలుపైనే రాహుల్ గాంధీ పెడతారని.. ఏపీ పీసీసీ చీఫ్ రఘువీరా రెడ్డి చెబుతున్నారు. అదే సమయంలో కొద్ది రోజుల క్రితం జరిగిన కాంగ్రెస్ పార్టీ ప్లీనరీలో తీర్మానం కూడా చేశారు. నిన్న జరిగిన కాంగ్రెస్ వర్కింగ్ కమిటి సమావేశంలోనూ మళ్లీ నిర్ణయం తీసుకున్నారు. ఎలాంటి పరిస్థితులు ఎదురైనా.. ఆంధ్రప్రదేశ్‌కు ప్రత్యేకహోదా ఇస్తామని తేల్చేశారు. నిజంగా ఏపీ ప్రజలకు ఊరటనిచ్చే అంశమే.
ఆంధ్రప్రదేశ్‌కు ప్రత్యేకహోదా నిరాకరించడానికి ప్రత్యేకమైన కారణాలేమీ లేకపోయినా.. బీజేపీ.. పధ్నాలుగో ఆర్థిక సంఘం నిబంధనలను తనకు ఇష్టం వచ్చినట్లు అన్వయించుకుని ఇవ్వనని తేల్చింది. ఇప్పుడు కాంగ్రెస్ పార్టీ ఇస్తానంటోంది. నిజంగా కాంగ్రెస్ పార్టీ అధికారలో ఉండి ఉంటే..ఏం జరిగిదో మనం ఊహించలేము. కానీ.. ప్రతిపక్షంలో ఉన్న పార్టీలు… అధికార పార్టీ చేయలేని దాన్ని చేసి చూపిస్తామని చెప్పడం ద్వారా అధికారంలోకి వస్తాయి. దానికి బీజేపీనే పెద్ద ఉదాహరణ… నల్లధనం నుంచి.. అవినీతి పరులకు శిక్షల వరకూ చాలా చెప్పారు. ఒక్కటంటే.. ఒక్కటి కూడా అమలు చేయలేదు. అన్నింటినీ “జుమ్లా”లుగా తేల్చారు. మరి మళ్లీ కాంగ్రెస్ పార్టీ అధికారంలోకి వస్తే.. ఇలానే చేయదని గ్యారంటీ ఏమిటి..?
ఈ అనుమానాలు ప్రారంభమవడానికి కూడా కాంగ్రెస్ నేతలే అవకాశాలు కల్పించారు. విభజన హామీలపై జరిగిన మోసాన్ని పార్లమెంట్ సాక్షిగా నిలదీయాలని తెలుగుదేశం పార్టీ అవిశ్వాసం పెట్టింది. అందులో రాహుల్ గాంధీ చాలా మాట్లాడారు. గల్లా జయదేవ్ ప్రసంగం ఏపీ ప్రజల ఆవేదనను బయట పెట్టిందన్నారు. కానీ ఏపీకి ప్రత్యేకహోదా ఇవ్వాల్సిందేనని ఎందుకు డిమాండ్ చేయలేదు..? పార్లమెంట్ సాక్షిగా..మన్మోహన్ ఇచ్చిన హామీని అమలు చేయకపోవడం.. ప్రజాస్వామ్యాన్ని పరిహసించడమేనని ఎందుకు నిలదీయలేదు..? అసలు ప్రత్యేకహోదా గురించి ఒక్క మాట కూడా.. రాహుల్ ఎందుకు మాట్లాడలేదు..? ఈ అనుమానాలన్నీ సగటు ఆంధ్రుడికి వస్తున్నాయి.
విభజన చేసింది కాంగ్రెస్ పార్టీ. ప్రత్యేకహోదా ఇస్తామని కాంగ్రెస్, బీజేపీ సంయుక్తంగా చెప్పుకొచ్చాయి. ఇప్పుడు అధికారంలో ఉన్న పార్టీ యూటర్న్ తీసుకుంది. ప్రతిపక్షంలో ఉన్న పార్టీ మేము వచ్చాకా ఇస్తామంటోంది. ప్రజలకు మరో ఆప్షన్ లేదు. అసలు గొంతు కోసిన పార్టీ అయినా.. ఇస్తామన్న కాంగ్రెస్‌పైనే బీజేపీ కన్నా ఎక్కువగా సానుభూతి చూపిస్తారు. కానీ ఏపీలో తమకేమీ లేదన్న నిర్లక్ష్యాన్ని పీఠం అందుకున్న తర్వాత చేయరన్న గ్యారంటీ ఏమిటి..?
