జ‌న‌సేన అధినేత ప‌వ‌న్ క‌ల్యాణ్ కి మ‌రోసారి కంటి చికిత్స జ‌రిగింది. హైదరాబాద్ లోని సెంటర్ ఫర్ సైట్ కంటి ఆసుప‌త్రిలో ప‌వ‌న్ కి చికిత్స ఈరోజు జరిగినట్టు జ‌న‌సేన పార్టీ ఒక ప్ర‌క‌ట‌న‌లో తెలిపింది. తాజా చికిత్స నేప‌థ్యంలో కొన్నాళ్ల‌పాటు విశ్రాంతి తీసుకోవాల‌ని ప‌వ‌న్ కి వైద్యులు సూచించారు. ఆయన చికిత్స చేయించుకోవడం ఇది రెండోసారి.
నిజానికి, గ‌డ‌చిన కొన్ని నెల‌లుగా కంటి స‌మ‌స్య‌తో ప‌వ‌న్ క‌ల్యాణ్ బాధ‌ప‌డుతున్నారు. అందుకే, ఆ మ‌ధ్య ఆయన ఏ కార్య‌క్ర‌మానికి హాజ‌రైనా కొన్నాళ్లుపాటు క‌ళ్ల‌జోడు పెట్టుకుని క‌నిపించారు. రంగ‌స్థ‌లం స‌క్సెస్ మీట్ లో కూడా ఆయన కళ్లద్దాల‌తోనే వ‌చ్చారు. గత నెలలో ఉత్త‌రాంధ్ర టూర్ విశాఖ‌లో ముగియ‌గానే చికిత్స చేయించుకున్నారు. ప‌వ‌న్ క‌ల్యాణ్ కంటిలో ఏర్ప‌డ్డ కురుపుని తొల‌గించిన‌ట్టు అప్పుడు వైద్యులు చెప్పారు. అయితే, ఆ త‌రువాత నుంచి త‌గినంత విశ్రాంతి తీసుకోక‌పోవ‌డంతో ఇన్ఫెక్ష‌న్ వ‌చ్చింద‌నీ, మ‌రోసారి ఆపరేషన్ చేయాల్సి ఉంటుంద‌ని వైద్యులు సూచించారు. దీంతో రెండోసారి ఆపరేషన్ చేయించుకున్నారు.
