లక్ష్మీనరసింహస్వామి అంటే దర్శకుడు బోయపాటి శ్రీనుకి ఎంతో భక్తి! ఓ రకంగా చెప్పాలంటే ఆయనకు సింహా అనేది సెంటిమెంట్‌ కూడా!! సెంటిమెంట్‌ అని ఎందుకు అనాల్సి వస్తుందంటే… ప్రతి సినిమాలోనూ ఏదో ఒక సందర్భంలో, సన్నివేశంలో లక్ష్మీనరసింహాస్వామి ప్రస్తావన వుండేలా బోయపాటి చూసుకుంటున్నారు. ఉదాహరణకు… సింహా, లెజెండ్‌ సినిమాల్లో టెంపుల్ బ్యాక్‌డ్రాప్‌లో సన్నివేశాలు లేదా ఫైట్లు తీశారు. సరైనోడులోనూ టెంపుల్ బ్యాక్‌డ్రాప్‌ ఫైట్ వుంటుంది. కానీ, అక్కడ నరసింహస్వామి అని చూపించలేదనుకోండి. ప్రస్తుతం రామ్‌చరణ్‌ హీరోగా తెరకెక్కిస్తున్న సినిమాలోనూ టెంపుల్ బ్యాక్‌డ్రాప్‌లో సన్నివేశాలు తీశారు. అదీ విశాఖలోని సింహాచలంలో గల లక్ష్మీనరసింహస్వామి ఆలయంలో!! రామ్‌చరణ్‌ హీరోగా బోయపాటి శ్రీను దర్శకత్వంలో డీవీవీ దానయ్య నిర్మిస్తున్న సినిమా చిత్రీకరణ ఆదివారం సింహాచల వరాహ లక్ష్మీనరసింహస్వామి ఆలయంలో జరిగింది. రామ్‌చరణ దర్శనం కోసం వెళుతున్న సన్నివేశాలను, మాడవీధుల్లో పల్లకీసేవ సన్నివేశాలను, ఆనంతరం భక్తులకు ప్రసాదాలు పంచిపెడుతున్న సన్నివేశాలను బోయపాటి చిత్రీకరించారు. చరణ్‌తో పాటు స్నేహ, ఆర్యన్‌ రాజేశ్‌, ప్రశాంత్‌ తదితరులు షూటింగులో పాల్గొన్నారు. వచ్చే యేడాది సంక్రాంతికి ఈ సినిమాను విడుదల చేయడానికి సన్నాహాలు చేస్తున్న సంగతి తెలిసిందే!
చరణ్‌ చిత్రంలోనూ ‘నరసింహా స్వామి’ సెంటిమెంట్‌!
