‘మా’లో నరేష్ ప్యాన‌ల్ గెలిచి ఇంకా వారం రోజులు కూడా కాలేదు. ప్ర‌మాణ స్వీకారం రోజునే `మా`లో లుక‌లుక‌లు బ‌య‌ట ప‌డ్డాయి. నరేష్ ప్ర‌తీదానికీ ‘నేనూ.. నా’ అనే మాట‌లు ఎక్కువ‌గా మాట్లాడుతున్నార‌ని – ‘మేము’ అన‌డం లేద‌న్న కొత్త పాయింట్‌ని లేవ‌నెత్తారు రాజ‌శేఖ‌ర్ దంప‌తులు. `మా`లో వీళ్లూ గెలిచిన సంగ‌తి తెలిసిందే. కేవ‌లం నరేష్ అడ‌గ‌డం వ‌ల్లే వీరిద్ద‌రూ ఎన్నిక‌ల బ‌రిలో దిగారు. `నా చెల్ల‌మ్మా.. నా ముద్దుల బావ` అంటూ నరేష్ ఎన్నిక‌ల ముందు వీరిద్ద‌రినీ నెత్తిన ఎక్కించుకున్నాడు. ఇంత‌లోనే… వీళ్ల మ‌ధ్య మ‌న‌స్ఫ‌ర్థ‌లు బ‌య‌ట‌కు వ‌చ్చాయి. `నరేష్ గారు అంద‌రినీ క‌లుపుకుపోవాలి ఆయన కంగారులో `నేనూ.. నేనూ` అంటున్నారేమో..` అంటూ ప్ర‌మాణ స్వీకార మ‌హోత్స‌వ స‌భ‌లోనే జీవిత చుర‌క‌లు వేసింది. `ఈమాత్రం దానికే మాలో మాకు గొడ‌వ‌లు వ‌చ్చాయ‌నుకోకండి. మేమంతా ఒక్క‌టే. క‌ల‌సి ప‌నిచేస్తాం` అంటూ రాజ‌శేఖ‌ర్ క‌వ‌రింగు ఇచ్చాడు.
అయితే హేమ మాత్రం నరేష్ తీరుపై చిరుబురులాడుతోంది. ఓ దశ‌లో హేమ మాట్లాడాల‌ని మైకు అందుకుంటే దాన్ని నరేష్ లాగేసుకున్నాడు. దాంతో హేమ మరింత ఫైర్ అయ్యింది. ‘నరేష్ గారి ప‌ద్ద‌తి ఏం బాలేదు. మైకు లాగేసుకోవ‌డం ఏంటి` అంటూ అస‌హ‌నం ప్ర‌ద‌ర్శించింది. నరేష్ ఒక్క‌రే నిర్ణ‌యాలు తీసుకోవ‌డం స‌రికాద‌ని, ప్ర‌మాణ స్వీకారం సంద‌ర్భంగా నరేష్ చెప్పిన మాట‌లు, ఇచ్చిన హామీల‌న్నీ త‌న‌కు తాను తీసుకున్న‌వ‌ని, వాటిని జ‌న‌ర‌ల్ బాడీలో చ‌ర్చించాక అప్పుడు మాట్లాడితే బాగుంటుంద‌ని హేమ సూచించారు. మొత్తానికి ప్ర‌మాణ స్వీకారం రోజునే.. ‘మా’లో అల‌క‌లు మొద‌ల‌య్యాయి. ఈ కాపురం రెండేళ్ల పాటు ఎలా సాగుతుందో మ‌రి.
