ఎన్నికల్లో పోటీకి ఏ పార్టీకి అవకాశం దక్కని ప్రముఖ నేతలు తెలుగుదేశం పార్టీకి మద్దతు తెలుపుతున్నారు. వైసీపీలో చేరేందుకు లోటస్‌పాండ్‌కు వెళ్లి మరీ కండువా వేసుకోకుండా వెనక్కి వచ్చేసిన అనకాపల్లి నేత కొణతాల రామకృష్ణ.. తెలుగుదేశం పార్టీకి మద్దతివ్వాలని నిర్ణయించుకున్నారు. మూడు రోజుల పాటు.. అనుచరులతో రోజూ సమావేశం జరిపి అభిప్రాయాలు తెలుసుకుని… ఈ నిర్ణయం తీసుకున్నారు. విభజన హామీల కోసం కేంద్రంపై టీడీపీ పోరాటం చేయగలదని నమ్ముతున్నామన్నారు. టీడీపీ అభ్యర్థుల విజయానికి శక్తివంచన లేకుండా కృషి చేస్తామని.. టీడీపీ కోరితే ప్రచారం చేస్తానని ప్రకటించారు. నిజానికి.. ఆయన వైసీపీకి దూరమైన తర్వాత టీడీపీలో చేరుతారన్న ప్రచారం జరిగింది. కానీ.. ఆయన సీటు విషయంలోనో.. మరో కారణంతోనే.. కానీ వెనుకడుగు వేశారు. పలుమార్లు చంద్రబాబును కలిసినప్పటికీ ఏ విషయం చెప్పకపోవడంతో.. అభ్యర్థుల్ని కూడా ఖరారు చేశారు. ఆ తర్వాత వైసీపీ వైపు చూశారు. మళ్లీ మనసు మార్చుకున్నారు. ఇప్పుడు టిక్కెట్ లేకపోయినా టీడీపీకి మద్దతివ్వాలని నిర్ణయించుకున్నారు.
చిత్తూరు జిల్లాకు చెందిన మరో నేత… సీకే జయచంద్రారెడ్డి.. అలియాస్ సీకే బాబు కూడా.. తెలుగుదేశం పార్టీకి మద్దతు తెలిపారు. ఆయన చిత్తూరు నుంచి నాలుగు సార్లు ఎమ్మెల్యేగా గెలిచారు. చిత్తూరు నగరాన్ని ఒకప్పుడు గుప్పిట్లో పెట్టుకున్నారు. ఇప్పుడు.. ఆయన పట్టు సడలింది. అయితే.. భారీగా అనుచరవర్గం ఉంది. కాంగ్రెస్‌లో వైఎస్‌కి ఆప్తుడిగా ఉండేవారు. వైఎస్ హెలికాఫ్టర్ ప్రమాదంలో జరగకపోతే.. మొదటగా.. అప్పట్లో ఆయన ఇంటికే వెళ్లేవారు. ఆ సెంటిమెంట్ కారణంగా.. సీకే బాబును..జగన్ దూరం పెట్టారన్న ప్రచారం ఉంది. దాంతో ఆయన ఏ పార్టీకి కాకుండా పోయారు. ఇటీవల కూడా కొన్ని పార్టీల్లో టిక్కెట్ కోసం ప్రయత్నించారు. ఏ పార్టీలోనూ కుదరలేదు. ఇప్పుడు టీడీపీకి మద్దతిస్తానని ముందుకు వచ్చారు. చంద్రబాబును కలిసి వెళ్లారు.
ఏ పార్టీలో లేని పలువురు సీనియర్ నేతలు… టీడీపీకి మద్దతిచ్చేందుకు వెనుకాడటం లేదు. టిక్కెట్ ఆశించి పార్టీలో చేరిన హర్షకుమార్.. చంద్రబాబు టిక్కెట్ ఇవ్వకపోయినా… పాజిటివ్ గానే మాట్లాడారు. జగన్ వస్తే..రాష్ట్రం నాశనమైపోతుందని.. ఈ నేతలంతా… ఆందోళన చెందుతున్నారు. టీడీపీకి మద్దతు ప్రకటిస్తున్నారు. కొంత మంది నేరుగా.. టీడీపీలో చేరుతున్నారు.
