ఆంధ్రప్రదేశ్‌లో పోలింగ్ తేది దగ్గరకు రావడంతో… వైసీపీ.. ద్వితీయ శ్రేణి నేతలపై కన్నేసింది. తెలుగుదేశం పార్టీకి ద్వితీయ శ్రేణి నాయకత్వం, కార్యకర్తలు కొండంత బలంగా ఉంటారు . క్రియాశీలక కార్యకర్తలు ఎప్పుడూ తెలుగుదేశానికి వెన్నుదన్నుగా ఉంటారు. ఇప్పుడు జరుగుతున్న ఎన్నికల్లో కోస్తాలోని కీలక నియోజకవర్గాలలో వైసీపీకి చెందిన కొన్ని ప్రత్యేక బృందాలు.. మకాం వేశాయి. వీరి పని అంతా ఆయా నియోజకవర్గాలలో తెలుగుదేశం పార్టీకి బలంగా ఉన్న నేతల బలహీనతలేమిటో తెలుసుకోవడం, వారికున్న అనుచరగణాన్ని కొనేయడం. నియోజకవర్గంలో వైసీపీకి ఎక్కడ బలహీనంగా ఉందో తెలుసుకుని , ఆ ప్రాంతాలలో ప్రత్యర్ధి వర్గంలో ఉన్న బలమైన నేతలను తమ వైపుకు తిప్పుకునేందుకు ప్రయత్నాలు ప్రారంభించారు. కొంతమందిని పార్టీ మారుస్తూ…వైఎస్ఆర్ కాంగ్రెస్ పార్టీ కండువా వేస్తుండగా, మరికొందరికీ తెలుగుదేశం పార్టీలోనే ఉంటూ సైలెంట్ అయిపోవాల్సిందిగా లోపాయికారిగా డబ్బులు ముట్ట చెబుతున్నారన్న ప్రచారం జరుగుతోంది.
వైసీపీ టీం.. ఒక్కో నియోజకవర్గానికి 50 నుంచి 75 మంది వరకు పర్యటిస్తున్నారు. వీరు మండలాలలో, గ్రామాలలో కులాల వారీగా ఓటర్లను, అక్కడ ఉన్న వివిధ పక్షాల బలాబలాలను నేతల కదలికలను ఎప్పటికప్పుడు తెలుసుకుని తమ టీం హెడ్ కు చెబుతున్నారు. వారు అక్కడ ఎటువంటి వ్యూహంతో ముందుకు వెళ్లాలనే అంశంపై వైఎస్ఆర్ కాంగ్రెస్ పార్టీకి చెందిన అభ్యర్దులకు మార్గదర్శనం చేస్తున్నారు. గుంటూరు జిల్లాలలో ఓ నియోజకవర్గంలో మండల స్థాయి నేత ఒకరికి సుమారు కోటిన్నర రూపాయల వరకు ముట్టజెప్పి తెలుగుదేశానికి రాజీనామా చేయించారు. ఇదే నియోజకవర్గంలో మరికొందరు నేతలపై కూడా వల విసిరారు. కృష్ణా, పశ్చిమ గోదావరి, ప్రకాశం, గుంటూరు, తూర్పు గోదావరి జిల్లాలలో వైసిపి తరుపున పోటీ చేసే ధనవంతులైన అభ్యర్దులున్న నియోజకవర్గాలలో వైసీపీ టీడీపీ నేతల్ని ఆకట్టుకునే ప్రయత్నం చేస్తున్నారు.
తెలుగుదేశం పార్టీ అధికారంలో ఉన్న ఐదు సంవత్సరాల కాలంలో తమకు పదవులు రాక, ఎటువంటి గుర్తింపుకు నోచుకోని ద్వితీయ శ్రేణి నేతలు మాత్రం ప్రత్యర్ధులు విసురుతున్న వలలో చిక్కుకుంటున్నారు. అప్పులు ఉన్న కొంతమంది నేతల కుటుంబ అవసరాల కోసం డబ్బు కూడా ఇచ్చి వారిని తమ వైపుకు తిప్పుకుంటున్నారు. వైసిపి వ్యూహాన్ని తెలుసుకున్న తెలుగుదేశం నేతలు విరుగుడు వ్యూహంతో ముందుకు వెలుతున్నారు. రివర్స్‌లో వైసీపీ నేతల్ని పార్టీలో చేర్చుకునే ప్రయత్నం చేస్తున్నారు.
