వెంకీ సినిమా… సెకండాఫ్ స‌మ‌స్య‌

పెళ్లి చూపులు సినిమాతో సూప‌ర్ స‌క్సెస్ కొట్టాడు త‌రుణ్ భాస్క‌ర్‌. విజ‌య్ దేవ‌ర‌కొండ లాంటి ఓ స్టార్ ఈ సినిమాతోనే వెలుగులోకి వ‌చ్చాడు. ద‌ర్శ‌కుడిగా త‌రుణ్‌కీ మంచి అవ‌కాశాలొచ్చాయి. ఈ న‌గ‌రానికి ఏమైంది ఫ్లాప్ అయినా – త‌రుణ్ ఛాన్సుల‌కు కొద‌వ లేకుండా పోయింది. ఇప్పుడు వెంక‌టేష్ తో ఓ సినిమా ఫిక్స‌య్యింది. ఈ సినిమానీ సురేష్ ప్రొడ‌క్ష‌న్స్ సంస్థ‌నే నిర్మిస్తోంది. నిజానికి ఎప్పుడో కొబ్బ‌రికాయ కొట్టుకోవాల్సిన సినిమా ఇది. ఇప్ప‌టి వ‌ర‌కూ ఒక్క అడుగు కూడా ముందుకు వేయ‌లేదు. దానికి కార‌ణం సెకండాఫ్ ఇంకా సెట్ కాక‌పోవ‌డ‌మే అని తెలిసింది. ఇది వ‌ర‌కే.. వెంకీ, సురేష్‌బాబుల‌కు లైన్ వినిపించి ఓకే చేయించుకున్నాడు త‌రుణ్‌. అయితే స్క్రిప్టుగా మార్చే ప‌నులు మాత్రం ఇంకా ఓ కొలిక్కి రాలేద‌ని తెలుస్తోంది. ద్వితీయార్థం ఇంకా తేల‌డం లేదని, ఎన్ని వెర్ష‌న్లు చెప్పినా సురేష్ బాబు ఓకే చేయ‌డం లేద‌ని టాక్‌. అన్నీ అనుకున్న‌ట్టు జ‌రిగితే వెంకీ మామ త‌ర‌వాత త‌రుణ్ భాస్క‌ర్ సినిమానే ప‌ట్టాలెక్కాలి. కానీ త‌రుణ్ మాత్రం క‌థ‌ని పూర్తి స్థాయిలో సిద్ధం చేయ‌డంలో విఫ‌లం అవుతున్నాడు. మ‌రి.. వెంకీ ఎలాంటి స్టెప్ తీసుకుంటాడో చూడాలి.