నిఖిల్ క‌థానాయ‌కుడిగా న‌టించిన చిత్రం ‘అర్జున్ సుర‌వ‌రం’. ఈ శుక్ర‌వారం విడుదల కాబోతోంది. ప్ర‌స్తుతం హైద‌రాబాద్‌లోని పీపుల్స్ ప్లాజాలో ప్రీ రిలీజ్ ఈవెంట్ జ‌రుగుతోంది. ఈ కార్య‌క్ర‌మానికి చిరంజీవి ముఖ్య అతిథిగా విచ్చేశారు. ఈ చిన్న సినిమాకి ఆశీస్సులు అందించ‌డానికి చిరు పెద్ద మ‌న‌సు చేసుకుని రావ‌డంతో నిఖిల్ ఆనందానికి అవ‌ధుల్లేవు. అందుకే… మెగా డాన్స్ ట్రీట్ ఇచ్చాడు. చిరు సినిమాల్లోని సూప‌ర్ హిట్ పాట‌ల‌కు నిఖిల్ స్టేజీపై స్టెప్పులు వేశాడు. ముఠామేస్త్రీ, ఠాగూర్, సైరా చిత్రాల్లోని పాట‌ల‌కు నిఖిల్ చిందులు వేశాడు. చివ‌ర్లో వేదిక పై నుంచి కింద‌కి వ‌చ్చి… చిరుకి ఓ క‌త్తి బ‌హుమానంగా అందించాడు. ఆ క‌త్తిని ప్రేమ‌గా అందుకున్న చిరు… నిఖిల్‌ని ఆశీర్వ‌దించాడు. ఈ చిత్ర నిర్మాత ఠాగూర్ మ‌ధుకి చిరుకీ మంచి అనుబంధం ఉంది. ఠాగూర్ మ‌ధు కోస‌మే చిరు ఈ వేడుక‌కు విచ్చేసినా – నిఖిల్ త‌న స్టెప్పుల‌తో చిరుని మైమ‌రిపించాడు.
చిరుకి నిఖిల్ `డాన్స్’ ట్రీట్
