ప్రేమించేవాళ్ల‌ని అభిమానుల్ని సంపాదించుకోవ‌డం బ్యాంకు బెలెన్సులు పెంచుకోవ‌డంతో స‌మాన‌మ‌న్నారు చిరంజీవి. ఈరోజు హైద‌రాబాద్‌లోని పీపుల్స్ ప్లాజాలో జ‌రిగిన ‘అర్జున్ సుర‌వ‌రం’ ప్రీ రిలీజ్ ఈవెంట్ కి చిరు ముఖ్య అతిథిగా హాజ‌ర‌య్యారు. నిఖిల్‌ని చూస్తే, త‌నకు మరో త‌మ్ముడు, శిష్యుడు దొరికినంత ఆనందంగా ఉంద‌ని, అభిమాన ధ‌న రూపంలో త‌న బ్యాంకు బాలెన్స్ నిఖిల్ మ‌రింత పెంచాడ‌ని చ‌మ‌త్క‌రించారు చిరు. ఈ సినిమా తాను చూశాన‌ని, బాగా న‌చ్చింద‌ని, ఈ త‌రం చూసి, తెలుసుకోవాల్సిన విష‌యాలు ఇందులో ఉన్నాయ‌ని, చెగోవెరాకి సంబంధించిన పాట చూస్తున్న‌ప్పుడు త‌న త‌మ్ముడు ప‌వ‌న్ క‌ల్యాణ్ గుర్తొచ్చాడ‌న్నారు.
“సోషల్ మీడియా బాగా పెరిగింది. ఇంటర్నెట్ తో మ‌మేకం అవుతున్నాం. అయితే మ‌న స‌మాచారాన్ని, మ‌ర ర‌హ‌స్యాల్ని మ‌న‌మే బ‌హిర్గ‌తం చేసుకుంటున్నాం. సెల్ ఫోన్ స్విచ్చాఫ్ చేసినా, మ‌న కెమెరా ద్వారా మ‌న బెడ్ రూమ్‌లో ఏం జ‌రుగుందో ఇత‌రులు తెలుసుకోగ‌లుతున్నారు. ఇంత ప్ర‌మాద‌క‌ర‌మైన స్థాయిలో మ‌నం ఉన్నాం. ఈ విష‌యాల‌న్నింటినీ ఈ సినిమా ద్వారా చెప్పే ప్ర‌య‌త్నం చేశారు. ఇప్ప‌టి వ‌ర‌కూ ల‌వ‌ర్ బోయ్ గా న‌టించిన నిఖిల్ ఈ సినిమాతో యాక్షన్ హీరో అవ‌తారం ఎత్తాడు. లావ‌ణ్య త్రిపాఠి న‌ట‌న బాగుంది. ముఖ్యంగా త‌న న‌వ్వంటే నాకు చాలా ఇష్టం” అన్నారు.
