ప‌వ‌న్ క‌ల్యాణ్ కి నితిన్ ఎంత భ‌క్తుడో ప్ర‌త్యేకంగా చెప్పాల్సిన ప‌నిలేదు. వీలైన‌ప్పుడ‌ల్లా, వీలు లేకున్నా స‌రే.. ప‌వ‌న్ గురించి ఒక్క మాటైనా మాట్లాడేస్తాడు. త‌న సినిమాల్లో ప‌వ‌న్‌కి సంబంధించిన రిఫ‌రెన్సులెన్నో క‌నిపిస్తాయి. తాజాగా `భీష్మ`లో కూడా ప‌వ‌న్‌ని గుర్తు చేసి, ప‌వ‌న్ ఫ్యాన్స్‌కి ఖుషీ చేయ‌డానికి ప్ర‌య‌త్నించాడు. ఖుషీ సినిమాలోని ఓ స‌న్నివేశాన్ని నితిన్ ఇందులో ఇమిటేట్ చేశాడు. ఇలా ప్ర‌తీసారీ ప‌వ‌న్‌ని గుర్తు చేయాల్సిందేనా? అడిగితే.. ఏమాత్రం మొహ‌మాటం లేకుండా `య‌స్‌` అనేస్తున్నాడు నితిన్.
త‌న ప్ర‌తీ సినిమాలోనూ ప‌వ‌న్‌కి సంబంధించిన రిఫరెన్స్ క‌నిపిస్తుంద‌ని, ఒక పాట‌లోనో, డైలాగ్‌లోనో ప‌వ‌న్‌ని గుర్తు చేస్తూనే ఉన్నాన‌ని, ఇది వ‌ర‌కు మీడియా ఇంత‌గా లేదు కాబ్ట‌టి, కొన్ని సినిమాలు ఫ్లాపులు అయ్యాయి కాబ‌ట్టి అవేమీ వెలుగులోకి రాలేద‌ని, ఇప్పుడు మాత్రం అవే క‌నిపిస్తున్నాయని, ఇదంతా ప‌వ‌న్‌పై త‌న‌కున్న ప్రేమ‌ని, అభిమానాన్ని చాటుకోవ‌డంలో ఓ భాగ‌మే అని, ప‌వ‌న్ ని గుర్తు చేయ‌డం ఎప్ప‌టికీ వ‌ద‌ల‌న‌ని నితిన్ చెప్పేశాడు. త‌న రాబోయే సినిమాల్లోనూ ప‌వ‌న్ రిఫ‌రెన్సులు ఉంటాయ‌ని ఈ విష‌యంలో తాను మొహ‌మాట‌ప‌డ‌న‌ని చెప్పుకొచ్చాడు నితిన్. అయితే భీష్మ‌లో ఖుషీ సీన్ ఒక్క‌దాన్నే వాడాన‌ని అంతకు మించిన రిఫ‌రెన్సులు ఉండ‌వ‌ని క్లారిటీ ఇచ్చాడు.
