దేశంలో కరోనా వైరస్ కేసులు ఏ మాత్రం తగ్గుముఖం పట్టలేదు… సరి కదా.. ప్రతీ రోజూ.. సరికొత్త రికార్డుకు చేరువు అవుతున్నాయి. అత్యధిక కేసులు నమోదవుతున్నాయి. దేశలంలో సింగిల్ డే ఏడు వేలకుపైగా కేసులు నమోదయ్యాయి. రాష్ట్రాల్లోనూ ఒక్క రోజులో అత్యధిక కేసులు నమోదవుతున్నాయి. ఇలాంటి పరిస్థితుల్లో కేంద్రం… అన్ లాక్ ప్రక్రియ ప్రారంభించింది. మాల్స్ సహా అంతర్రాష్ట్ర సర్వీసులు కూడా ప్రారంభించుకోవడానికి ఓకే చెప్పింది. అతి తక్కువ కేసులు ఉన్నప్పుడు లాక్ డౌన్ విధించి.. ఇప్పుడు నిబంధనలు సడలించడంపై చాలా మందిని ఆశ్చర్య పరుస్తోంది కానీ.. కేంద్రం మాత్రం… తమైదన వ్యూహంతో వెళ్తోందని నిపుణులు అంచనా వేస్తున్నారు.
కరోనాను తరిమికొట్టడం అసాధ్యమని తేలిపోయింది. ఎంత కట్టడి చేసినా వ్యాపిస్తూనే ఉంది. ఇలాంటి సమయంలో… ఆ కరోనాను తట్టుకునే సామర్థ్యాన్ని పెంచుకోవడం తప్ప.. చేయగలిగిందేమీ లేదనే నిర్ణయానికి వచ్చినట్లుగా తెలుస్తోంది. దానికి ఉన్న మార్గం హెర్డ్ ఇమ్యూనిటీ. సామూహికంగా రోగ నిరోధక శక్తి పెంచుకోగలిగితే.. వైరస్ ప్రభావం తక్కువగా ఉంటుంది., ఇప్పటికే బ్రిటన్, స్వీడన్ లాంటిదేశాలు ఈ విషయంలో మెరుగైన ఫలితాలు సాధించినట్లుగా తెలుస్తోంది. అయితే.. ఈ విషయాన్ని నేరుగా చెబితే అనేక విమర్శలు వస్తాయి. ప్రజల్ని కరోనాకు వదిలి పెట్టేస్తున్నారా.. అని విపక్షాలు ప్రశ్నిస్తాయి. అందుకే.. హెర్డ్ ఇమ్యూనిటీ కోసం ప్రయత్నిస్తున్నట్లుగా కాకుండా.. నిబంధనలు ఎత్తివేత ద్వారా.. మరో మార్గం.. ఆ ప్రయత్నం చేస్తున్నట్లుగా కనిపిస్తోంది.
అన్‌లాక్ నిబంధనల్లో అత్యంత కీలకమైనది చిన్నపిల్లలు, వృద్ధులు బయటకు రాకపోవడం. వారికి రోగ నిరోధక శక్తి తక్కువగా ఉంటుంది కాబట్టి.. కరోనా నుంచి కాపాడుకోవడం కష్టమవుతుంది. అందుకే.. వారు బయటకు రాకూడదని..నిబంధనలు విధించారు. యువతకు.. కరోనాను తట్టుకునే సామర్థ్యం ఉంటుంది. అందుకే.. కరోనా సోకినట్లుగా బయటపడిన వారిలో … 70, 80 శాతం మందికి లక్షణాలు కనిపించడం లేదు. చాలా మందికి.. కరోనా సోకి తగ్గిపోయి ఉంటుందనే అంచాలు ఉన్నాయి. హైదరాబాద్‌లోని కంటెయిన్మెంట్ జోన్లలో ఐసీఎంఆర్ ప్రత్యేక పరీక్షలు చేసింది. పెద్ద ఎత్తున శాంపిళ్లను సేకరించింది. ఈ ఫలితాలతో కరోనా ఎంత మందికి సోకి నయమయిందో స్పష్టత వచ్చే అవకాశం ఉంది. హెర్డ్ ఇమ్యూనిటీ దిశగా వెళ్తున్నామో లేదో కూడా తెలుస్తుందని అంచనా వేస్తున్నారు.
